Ղարաբաղյան հակամարտությունը չի կարող լուծվել ուժային ճանապարհով. Լավրով

ԵՐԵՎԱՆ, 22 ապրիլի. /Նովոստի–Արմենիա/. Լեռնային Ղարաբաղի հակամարտությունը չի կարող ունենալ ուժային լուծում, ասաց ՌԴ արտաքին գործերի նախարար Սերգեյ Լավրովն իր հայ գործընկեր Էդվարդ Նալբանդյանի հետ համատեղ մամուլի ասուլիսում։

Նա նշեց, որ հայ գործընկերների հետ քննարկվել է իրավիճակը ղարաբաղյան հակամարտության գոտում, ավելացնելով, որ Ռուսաստանը հավատարիմ է 1994 թվականի մայիսին ստորագրած հրադադարի համաձայնագրի անվերապահ կատարմանը, որն անժամկետ համաձայնագիր է համարվում։

Լավրովի խոսքով, Ռուսաստանը որպես ԵԱՀԿ Մինսկի խմբի համանախագահ երկիր կանի ամեն ինչ, որ հրադադարը շարունակական լինի այս փուլում, ինչպես նաև համաձայնություն գրանցվի երկու կողմերի միջև փոխընդունելու լուծումների հիման վրա։

«Հետագա հապաղումը սխալ կլիներ։ Ընդհանուր առմամբ, բավարարված ենք մեր բանակցությունների ընթացքով»,– ավելացրեց Լավրովը։

ՌԴ ԱԳՆ ղեկավարը երկօրյա այցով է ժամանել Հայաստան։ Ավելի վաղ նա ծաղկեպսակ է դրել Ծիծեռնակաբերդում։ -0-