Գարիկ Մարտիրոսյանը, Արա Մալիքյանը և մերոնք. Ինչպես է Հայաստանը տոնելու Անկախության օրը COVID-19-ի պայմաններում

ԵՐԵՎԱՆ, 16 սեպտեմբերի./Նովոստի-Արմենիա/. Այս տարի Հայաստանի անկախության 29-ամյակին նվիրված տոնակատարությունները կանցկացվեն «Մեր Հայրենիք» խորագրի ներքո, ինչը խորհրդանշում է ողջ աշխարհի հայրենի միավորման և ընդհանուր հայրենիքի գաղափարը: Ինչպես հաղորդում է կառավարության մամուլի ծառայությունը, սեպտեմբերի 21-ի միջոցառումների մեծ մասը կանցկացվի օնլայն ռեժիմով կորոնավիրուսի համավարակի հետևանքով:

Առաջին ալիքի եթերն այդ օրն առավոտյան 11:15-ից լցվելու է բոլոր այն խորագրերով, որոնք արդեն ներկայացրել ենք: 11 տարբեր համերգ է սպասվում` նկարահանված Հայաստանի ամենաանսպասելի վայրերում: Լսելու եք Նարեկ Հախնազարյանի ելույթը [Աժդահակի գագաթից], Ֆիլհարմոնիկ նվագախմբի, «Բամբիռի», Արամ MP3-ի, «Գեղարդ» երգեցիկ խմբի, Նորայր Քարտաշյանի ու «Մենուա» բենդի [Երերույքի տաճարից], Իվետա Մուկուչյանի, Գյուրջիև անսամբլի, Հայկ Մելիքյանի [Սարդարապատից] կատարումները, ինչպես նաև տեսնելու եք Կարինի պարը:

Այս ամենից բացի, իրենց ողջյուններն են փոխանցելու մեր սահմանը պահող տղերքը, իրենց փորձով են կիսվելու ինչպես այն մարդիկ ու թիմերը, որոնք հաջողության են հասել հայրենիքում, այնպես էլ բոլորի հարգանքը վայելող այն հայերը, որոնք իրապես գիտեն անկախության նշանակությունը։

Անկախության գալա համերգն ամբողջ միջոցառման տրամաբանական ամփոփումն է լինելու, որի նպատակն է ցույց տալ Սփյուռքի, Արցախի ու Հայաստանի եռամիասնությունը:

Բացի այդ, եթերում կլինեն երիտասարդ դերասաններ, որոնք Վանաձորից կբեմականացնեն անկախության տարիներին գրված տողերը, իսկ աշխարհի տարբեր անկյուններում ապրող մեր հայտնի հայերը կմիանան սպասված գալա համերգին՝ հայկական ստեղծագործություններ կատարելով: Աշխարհի տարբեր անկյուններից մերոնք կուղարկեն հայկական ստեղծագործություններից մեկի իրենց կատարումը: Հայտնի հայերի շարքում կլինեն Տիգրան Համասյանը, Արա Մալիքյանը, Գարիկ Մարտիրոսյանը և ոչ միայն:

Եվ վերջում՝ ինչ Անկախության օր առանց Մեր Հայրենիքի. «Մեր հողերը» խորագրի շրջանակում թռչնի թռիչքի բարձրությունից կբացահայտենք հայկական ճարտարապետության, մշակույթի ու բնության գեղեցկությունը:

Այս ամենը եթերում կլինի 7 ժամվա ընթացքում, այնպես որ ազատեք ոչ աշխատանքային երկուշաբթին ու պատրաստվեք դիտելու վիզուալ ամենահետաքրքիր եթերներից մեկը:-0-

ՀՀ Անկախության օր Facebook-յան էջում պարբերաբար թարմացումներ են ներկայացվում սեպտեմբերի 21-ի տոնակատարությունների հետ կապված: -0-