Եթե տարաների վրա աղաջուր լցված լիներ, հրդեհ չէր լինի. «Նաիրիտ»-ի նախկին տնօրեն

ԵՐԵՎԱՆ, 29 օգոստոսի. /Նովոստի–Արմենիա/. «Նաիրիտ» գործարանում անվտանգության կանոնները հավանաբար խախտվել են, ինչի հետևանքով էլ նախօրեին բռնկվել են շուրջ 7 տարի կուտակված թափոնները, այս մասին «Ազատություն» ռադիոկայանի հետ զրույցում կարծիք է հայտնել «Նաիրիտ»-ի նախկին տնօրեն Կարեն Իսրայելյանը:

«Իրականում արտադրության ժամանակ այդ նյութը մենք ինքներս այրում էինք: Կան հատուկ վառարաններ՝ նյութը այրելու համար։ Ես գիտեմ, որ ունենք 4-5 հատ տարաներ, որոնք բաց են, շփում կա օդի հետ, այդ տարաներն են վառվել: Ժամանակին մենք աղաջուր էինք լցնում տարաների վրա, որպեսզի թույլ չտանք շփում օդի հետ»:


«Նաիրիտ»-ի նախկին տնօրենի խոսքով, հրավտանգ նյութի նման կուտակում թույլ չտալու համար հարկավոր էր այն ժամանակին այրել հատուկ վառարաններում:

«Եթե աղաջուր լցված լիներ վրան, երբեք նման բան չէր լինի: Կարող եմ ասել, որ երևի աշխատողների քիչ քանակի պատճառով այդ աշխատանքները չեն կատարվում: Որովհետև այսօր այդ գործարանում աշխատում են քիչ թվով մարդիկ, որի հետևանքով մարդիկ, հնարավոր է, չկարողանան իրականացնել այն աշխատանքները, որոնք պարտավոր են անել»:

Օգոստոսի 28-ին ժամը 13:10-ին ահազանգ է ստացվել, որ Երևան քաղաքի «Նաիրիտ» գործարանի տարածքում պայթյունի ձայն է լսվել և հրդեհ է բռնկվել: Գործարանի տարածքում այրվում էին լաքէթինոլ նյութով տարաներ:


Գերատեսչության պատասխանատուները վստահեցնում են, որ թունավոր նյութերի արտանետում չի գրանցվում, քաղաքի և մարդկանց առողջությանը վտանգ չի սպառնում։ Գործարանի տարածքում հրդեհաշիջման աշխատանքները շարունակվել են ամբողջ գիշեր: Այսօր առավոտյան ԱԻՆ մամուլի ծառայությունը հայտարարել է, որ առավոտյան ժամը 09.00-ի դրությամբ էթինոլի 4 երկաթբետոնե տարաներից 3-ում կրակը մարված է, հրդեհի փոքր օջախ է մնացել միայն մի տարայում:-0-