Երևանը կդառնա «կանաչ քաղաք»

ԵՐԵՎԱՆ, 25 օգոստոսի. /Նովոստի–Արմենիա/. Երևանի քաղաքապետարանում ներկայացվել է «Կանաչ քաղաք» գործողությունների ծրագիրը:

Գերատեսչության մամուլի ծառայության տեղեկացմամբ, ծրագիրը մշակվել է Վերակառուցման և զարգացման եվրոպական բանկի հետ համագործակցության շրջանակում։

Երևանի քաղաքապետի տեղակալ Վահե Նիկոյանը, ներկայացնելով ծրագիրը, համոզմունք է հայտնել, որ «Կանաչ քաղաք»-ի իրագործումը կարևոր նշանակություն կունենա քաղաքային տնտեսության զարգացման տեսանկյունից:

Նա ներկայացրել է ծրագրի հետ կապված իր դիտարկումներն ու առաջարկները: Հաշվի առնելով, որ Երևանի բնապահպանական իրավիճակի համակարգված բարելավումը մայրաքաղաքի զարգացման ծրագրերի հիմնական գերակայություններից է՝ քաղաքապետի տեղակալն ընդգծել է, որ ծրագիրը կընդգրկվի Երևանի զարգացման ծրագրերում:

«Կանաչ քաղաք» գործողությունների ծրագրի թիմի ղեկավար, Ծրագրի խորհրդատու ճանաչված միջազգային «Էրնստ ընդ Յանգ» ընկերության ներկայացուցիչ Անդրեա Չիրլիչովան, շնորհակալություն է հայտնել հանդիպման համար, նշելով, որ «Կանաչ քաղաք»-ի հիմնական նպատակն է խթանել քաղաքի տնտեսական և սոցիալական աճը` անդրադառնալով մայրաքաղաքի բնապահպանական մարտահրավերներին։



Հանդիպման ընթացքում ծրագրի պատասխանատուները մանրամասն ներկայացրել են ծրագրի ընդհանուր դրույթներն ու ռազմավարությունը, համայնքի բնապահպանական մարտահրավերները և ըստ ոլորտների նախատեսված քայլերն ու թիրախային այն խնդիրները, որոնք պետք է լուծումներ ստանան ծրագրի իրականացման արդյունքում:

Մասնավորապես ուսումնասիրությունների շրջանակում գնահատվել է մայրաքաղաքի օդի, ջրային ռեսուրսների, հողի, կենսաբազմազանության և էկոհամակարգերի վիճակը, դրանց վրա բացասական ներազդող գործոնները և առկա օրենսդրական լուծումները՝ հիմնվելով միջազգայնորեն ընդունված չափանիշների վրա։



Գործողությունների ծրագիրն անցել է ռազմավարական էկոլոգիական գնահատում, որի շրջանակում կազմակերպվել են հանրային լսումներ:

Քաղաքապետարանից հայտնում են, որ «Կանաչ քաղաք» ծրագրի իրագործումը նախատեսված է տեղական գործընկերների և միջազգային կազմակերպությունների աջակցությամբ և ֆինանսական հաստատությունների հետ համագործակցությամբ: -0-