Երևանի կրկեսի վերաբացումը մոտ է

ԵՐԵՎԱՆ, 9 օգոստոսի. /Նովոստի–Արմենիա/. Երևանի կրկեսի շենքի արտաքին շինարարական աշխատանքներն ավարտված են, «Նովոստի–Արմենիա» գործակալությանը չորեքշաբթի հայտնեց Երևանի կրկեսի գեղարվեստական ղեկավար, Հայաստանի կրկեսային գործիչների միության նախագահ Սոս Պետրոսյանը։

«Շինարարական աշխատանքներն արագ տեմպերով առաջ են գնում։ Այցելելով աշխարհի տարբեր երկրներ` ես հասկանում եմ, որ մեր կրկեսը կդառնա աշխարհում լավագույններից մեկը։ Շենքն ամբողջությամբ հարդարված է, և ներկայում ներքին հարդարման աշխատանքներ են ընթանում»,– ասաց Պետրոսյանը։


Նրա խոսքով, շենքն ութ հարկանի կլինի, որոնցից երկուսը` նկուղային, ծառայելու են որպես ավտոկայանատեղի, իսկ շենքի ամենավերին հարկում կլինեն հյուրանոցային համարներ Հայաստան ժամանող կրկեսային խմբերի անդամների համար։

Պետրոսյանը ներկայացրեց նոր շենքի մի շարք առավելություններ։

«Նախկինում, օրինակ, շենքը չի ունեցել ստորգետնյա հարկեր, և մեքենաները կանգ առնելու տեղ չունեին, վարորդներին հաճախ էին տուգանում։ Հին շենքի բարձրությունը չէր համապատասխանում նորմերին` 18 մետր էր, իսկ այժմ շենքի բարձրությունը կազմում է 24-25 մետր, ինչը թույլ կտա Հայաստան բերել լավագույն արտրակցիոնները։ Եթե նախկինում դահլիճն ուներ 1.5 հազար տեղ, ապա այժմ այն կտեղավորի 2350 հանդիսատեսի։ Հին շենքը չուներ ոչ մի հարմարություն, ձմռանն այնտեղ ավելի ցուրտ էր, քան դրսում, իսկ ամռանը` ավելի շոգ»,– ասաց նա։

«Կարծում եմ, որ նոր շենքի շինարարական աշխատանքներն ամբողջովին կավարտվեն 1-1.3 տարուց»,– ավելացրեց նա։

Նրա խոսքով, դրանց ավարտիվ հետո կկայանա Երևանյան կրկեսի բացման հանդիսավոր արարողություն, որին մասնակցելու ցանկություն են հայտնել օտարերկրյա կրկեսային արտիստներ։ -0-