Երևանի բուքմեյքերական գրասենյակում սպանության մեջ մեղադրյալը ձերբակալվել է

ԵՐԵՎԱՆ, 25 փետրվարի. /Նովոստի–Արմենիա/. Օրեր առաջ ոստիկանները հայտնաբերել են 2015 թ.–ի դեկտեմբերի 24–ին Երևանի բուքմեյքերական գրասենյակներից մեկում աղմկահարույց սպանության կասկածյալ Կարեն Շահինյանին։ 

Հայտնաբերվել է Երևանի բուքմեյքերական գրասենյակում աղմկահարույց սպանություն կատարողը. մանրամասներ>>

ՀՀ և ՌԴ ոստիկանության աշխատակիցների համագործակցության արդյունքում Շահինյանը հայտնաբերվել է Ռուսաստանի Դաշնության Օրենբուրգի մարզի Բուզուլուկ քաղաքում։

Առաջիկայում Օրենբուրգ են մեկնելու ՀՀ ոստիկանության քրեական հետախուզության գլխավոր վարչության աշխատակիցները և ռուսական կողմին են ներկայացնելու անհրաժեշտ փաստաթղթեր։

Այս պահին լուծվում է Շահինյանին Հայաստան արտահանձնելու հարցը։

2015 թ. դեկտեմբերի 24-ին, ժամը 11.35-ին, Երևանի Մայիսի 9-ի փողոցի թիվ 49 շենքի 1-ին հարկում գործող բուքմեյքերական գրասենյակում հայտնաբերվել էր 1987 թ. ծնված Արթուր Նազարյանի դիակը՝ մարմնի տարբեր մասերում կտրած-ծակած վնասվածքներով:

Ոստիկանության քրեական հետախուզության գլխավոր, Երևան քաղաքի վարչությունների և Շենգավիթի բաժնի ծառայողների ձեռնարկած օպերատիվ-հետախուզական լայնածավալ միջոցառումների շնորհիվ պարզվել էր սպանությունը կատարելու մեջ կասկածվողի ինքնությունը՝ 1983 թ. ծնված, նախկինում դատված Կարեն Շահինյան:

Փաստի առթիվ հարուցվել էր քրեական գործ և նույն օրը նրա նկատմամբ հայտարարվել էր միջպետական հետախուզում:

Նախաքննությունը շարունակվում է:-0-