Եղանակը շարունակում է զարմացնել Հայաստանի բնակիչներին

ԵՐԵՎԱՆ, 6 հոկտեմբերի. /Նովոստի–Արմենիա/. Արևադարձային տաք օդային հոսանքների ազդեցությունը Հայաստանում կպահպանվի նաև առաջիկա 5 օրերին, Facebook-ի իր էջում գրել է Հայհիդոմետկենտրոնի օդերևութաբանական կանխատեսումների բաժնի պետի տեղակալ Գագիկ Սուրենյանը։

Դա նշանակում է, որ երկրում դեռ 5 օր էլ տաք և չոր եղանակը կպահպանվի։

Միայն ուրբաթ` հոկտեմբերի 7–ին, կնկատվի թույլ ամպամածություն, որը սակայն չի ազդի բարձր ջերմային ֆոնի վրա:

Մյուս օրերին հանրապետության բոլոր մարզերում սպասվում է արևառատ և առանց տեղումների եղանակ:

Ամենատաք օրերը կլինեն հոկտեմբերի 6-9-ին։ Երևանում այդ օրերին օդի ջերմաստիճանը կկազմի 28–29 աստիճան տաքություն։

Սյունիքի հովտային գոտում ջերմաստիճանը առանձին հատվածներում կհասնի +30, Արարատյան դաշտում նույնպես օդը կտաքանա մինչև 29 աստիճան տաքություն:

Օդի ջերմաստիճանը բարձր կլինի նաև լեռնային մարզերում, Շիրակում, Կոտայքի, Արագածոտնի, Վայոց Ձորի լեռնային բնակավայրերում, Գեղարքունիքում ցերեկային ժամերին սպասվում է +20...+25 աստիճան տաքություն:-0-