Առանց տեղումների եղանակ է սպասվում Հայաստանում հանգստյան օրերին

ԵՐԵՎԱՆ, 15 հունվարի. /Նովոստի–Արմենիա/. Ողջ հանրապետությունում հունվարի 16-18–ն առանց տեղումների եղանակ է սպասվում, հայտնում է Հայհիդրոմետկենտրոնը։

Միաժամանակ, տեղումներ են սպասվում հունվարի 15–ի և հունվարի 19–ի ցերեկը Վայոց Ձորի և Սյունիքի մարզերում, լեռնային շրջաններում` ձյան տեսքով, հովիտներում և նախալեռներում` անձրևախառն ձյան տեսքով։ Երևանում տեղումներ են սպասվում հունվարի 19–ից։

Քամին կլինի հարավ–արևմտյան` 2-7 մետր վայրկյան արագությամբ, հունվարի 15–ին առանձին շրջաններում հնարավոր է քամու ուժգնացում մինչև 25-30 մետր վայրկյան արագությամբ։

Օդի ջերմաստիճանը հունվարի 16–ի լույց գիշերը կնվազի 6-8 աստիճանով, իսկ այնուհետև աստիճանաբար կբարձրանա 7-9 աստիճանով։

Երևանում հունվարի 16–ի լույս գիշերը սպասվում է օդի ջերմաստիճանի նվազում մինչև 7 աստիճան ցուրտ, իսկ այնուհետև օդի ջերմաստիճանն աստիճանաբար կբարձրանա մինչև 9 աստիճան տաքություն։ -0-