ԵՐԵՎԱՆ, 14 մարտի./Նովոստի–Արմենիա/. Դատարանը կհրապարակի Հայաստանի երկրորդ նախագահ Ռոբերտ Քոչարյանի խափանման միջոցի երկարացման որոշումը մարտի 15–ին ժամը 15։00–ին, լրագրողներին հայտնեց նախկին նախագահի փաստաբան Հայկ Ալումյանը դատարանի նիստից հետո։
Ներկայում Հայաստանի երկրորդ նախագահ Ռոբերտ Քոչարյանը մարտի 1-ի գործի շրջանակում մեղադրվում է սահմանադրական կարգը տապալելու համար: Նա գտնվում է կալանքի տակ: Փետրվարի 12-ին Հատուկ քննչական ծառայությունը Քոչարյանին նոր մեղադրանքներ է առաջադրել «Առանձնապես խոշոր չափերի կաշառք ստանալը» հոդվածով:
«Ռոբերտ Քոչարյանը ելույթ է ունեցել մոտ 40 րոպե և ներկայացրել է 2008 թվականի փետրվարի 15–ից մարտի 2–ը կատարվածի մանրամասները։ Նա հնչեցրել է իր տեսակետի բոլոր այն թեզիսները, որոնց մասին մենք բազմիցս ասել ենք»,– ասաց Ալումյանը։
Փաստաբանի խոսքով, պաշտպանությունը բավականին ծանրակշիռ փաստարկներ ունի նախկին նախագահի խափանման միջոցը փոխելու համար։
«Այնուամենայնիվ, վաղը կտեսնենք, թե որը կլինի դատարանի որոշումը»,– ավելացրեց նա։
Ալումյանի խոսքով, քանի որ Քոչարյանի մեղադրանքը փոխվել է, փոխվել են նաև նրա պաշտպանության փաստարկները։ Փաստաբանը նշեց նաև, որ Քոչարյանը մեկնաբանել է նաև կաշառք ստանալու մեղադրանքը` այն անվանելով անհիմն։
ՀՀ երկրորդ նախագահ Ռոբերտ Քոչարյանը մեղադրվում է այլ անձանց հետ նախնական համաձայնությամբ սահմանադրական կարգը տապալելու մեջ։ Որպես մեղադրյալներ ներգրավված են նաև ՀԱՊԿ գլխավոր քարտուղար Յուրի Խաչատուրովը, ով ազատ էր արձակվել 5մլն դրամ գրավի դիմաց և ՀՀ պաշտպանության նախկին նախարարներ Միքայել Հարությունյանն ու Սեյրան Օհանյանը։ Փետրվարի 7–ին Վերաքննիչ դատարանը մերժեց ՀՀ նախկին նախագահ Ռոբերտ Քոչարյանի փաստաբանների բողոքը կալանքի ժամկետը երկարաձգելու վերաբերյալ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում