Չորեքշաբթի` հունիսի 12–ի առավել ուշագրավ նորությունները

08:00

13 Հունիսի 2019

ԵՐԵՎԱՆ, 13 հունիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է չորեքշաբթի` հունիսի 12–ի առավել ուշագրավ նորությունների իր տարբերակը։

Հայաստանի հավաքականը ԵՎՐՈ-2020-ի ընտրական փուլի շրջանակում 3։2 հաշվով առավելության հասավ Հունաստանի հավաքականի նկատմամբ։ Հանդիպումը կայացավ Աթենքի «Օլիմպիական» մարզադաշտում։ Հանդիպման 8-րդ րոպեին Ալեքսանդր Կարապետյանը բացեց խաղի հաշիվը: Իսկ արդեն 33-րդ րոպեին Գևորգ Ղազարյանը հիանալի գոլով կրկնապատկեց հաշիվը: Հանդիպման 74-րդ րոպեին էլ Տիգրան Բարսեղյանը խփեց Հայաստանի հավաքականի երորրդ գոլը։

Բարձրագույն դատական խորհրդի նախագահի պաշտոնակատար Գևորգ Դանիելյանի լիազորությունների դադարեցումից հետո Բարձրագույն դատական խորհրդի նախագահի պարտականությունների կատարումը վերապահվել է տարիքով ավագ անդամին՝ Խորհրդի դատավոր անդամ Սերգեյ Չիչոյանին։

ՀՀ քննչական կոմիտեի Սյունիքի մարզային քննչական վարչությունում կատարված քննչական գործողությունների արդյունքում պարզվել են 13-ամյա աղջնակի հետ սեռական հարաբերություն ունենալու դեպքի հանգամանքները: Քննչական կոմիտեի հաղորդմամբ, մեղադրանք է առաջադրվել աղջնակի հորը, ով կալանավորվել է։

«Բարգավաճ Հայաստան» կուսակցության ղեկավար, պատգամավոր Գագիկ Ծառուկյանն այսօր երեկոյան վկայի կարգավիճակով հարցաքննվելու է Քննչական կոմիտեում՝ Աբովյանում «Քաղաքացիական պայմանագրի» թեկնածուի շտաբի պետի ավտոմեքենան և տան մուտքը հրկիզելու գործով:

ՀՀ երկրորդ նախագահ Ռոբերտ Քոչարյանին կալանքից ազատելու, գործը կասեցնելու և Սահմանադրական դատարան ուղարկելու դեմ դատախազության ու տուժող կողմի փաստաբանների բողոքների քննությունը կշարունակվի հունիսի 14-ին : Այս մասին չորեքշաբթի հայտարարեց դատավոր Արմեն Դանիելյանը: -0-

Ծանոթացեք լուրերին առաջինն ու քննարկեք դրանք մեր Telegram-յան ալիքում

#Հայաստան #լուրեր #ամփոփում

Թեմատիկ նյութեր