«Բուրգեր քինգ»-ը պատրաստ է օգնություն ցուցաբերել պայթյունից տուժածներին

ԵՐԵՎԱՆ, 3 ապրիլի. /Նովոստի–Արմենիա/. «Բուրգեր քինգ» արագ սննդի կետը պատրաստ է անհրաժեշտ օգնություն ցուցաբերել իրենց կետում տեղի ունեցած պայթյունից տուժածներին, ասվում է «Բուրգեր Արմ» ՓԲԸ-ի տարածած հաղորդման մեջ:

Ապրիլի 2-ի ժամը 20:44-ին ԱԻՆ ահազանգ է ստացվել, որ Հյուսիսային պողոտա 5 հասցեում գտնվող «Բուրգեր քինգ» արագ սննդի կետում պայթյուն է տեղի ունեցել: Նախնական տեղեկություններով, խոհանոցում պայթել է լցնովի գարեջրի ճնշումն ապահովող թթվածնի բալոնը: ԱԻՆ տեղեկություններով, պայթյունից տուժել է 8 մարդ, այդ թվում` երկու երեխա: Տուժածների թվում Իրանի` երկու և Ռուսաստանի երեք քաղաքացի կա: Նրանք բոլորը տեղափոխվել են «Սուրբ Գրիգոր Լուսավորիչ» ԲԿ:


«Ժամը 20:30-ին տեղի ունեցած պայթյունի հետևանքով տուժածները գտնվում են հիվանդանոցում, բժիշկների վերահսկողության ներքո: «Բուրգեր քինգ» արագ սննդի կետի ներկայացուցիչները նույնպես հիվանդանոցում են: Մենք կարող ենք ցուցաբերել անհրաժեշտ օգնություն, ինչպես նաև օժանդակություն հետագա բուժման անհրաժեշտության դեպքում: Միջադեպը դժբախտ պատահար է, որի մանրամասներն այս պահին պարզվում են»,- նշել են ընկերությունից:

«Բուրգեր քինգ»-ում ափսոսանք են արտահայտում կատարվածի վերաբերյալ և հույս են հայտնել, որ բոլոր տուժածները շուտով կապաքինվեն և կգտնվեն ընկերության վերահսկողության ներքո: -0-