Բնապահպանության հարցերին նվիրված նոր նամականիշներ են մարվել Երևանում

ԵՐԵՎԱՆ, 1 դեկտեմբերի. /Նովոստի-Արմենիա/. Բնապահպանության և շրջակա միջավայրի պաշտպանությանը նվիրված երկու նոր նամականիշներ են մարվել հինգշաբթի Երևանում։

«Եվրոպա 2016։ կանաչ մտածեք» կարգախոսով նամականիշները թողարկել է «ՀայՓոստը», որն ամեն տարի եվրոպական թեմայով նամականիշներ է թողարկում PostEurope եվրոպական փոստային օպերատորների միջազգային մրցույթի շրջանակում։



Ինչպես նշեց Հայաստանում ԵՄ պատվիրակության ղեկավար Պյոտր Սվիտալսկին նամականիշների մարման արարողության ժամանակ, Հայաստանը Եվրոպայի մի մասն է և հարուստ է համատեղ պաշտպանության կարիք ունեցող բնական ռեսուրսներով։

«Հայաստանի բնության հարստությունները չեն բացահայտվել Եվրոպայի համար։ Դա հսկայական բնական հարստություն է, որը հատուկ պահպանության կարիք ունի։ Եվ այդ համատեքստում արդիական է մտածել կանաչ, այսինքն` եվրոպական ձևով»,– ասաց նա։



Առաջին նամականիշի վրա, որի հեղինակը Դոքսիա Սերգիտուն է, պատկերված է անդեմ քաղաքը կանաչ գույնով ներկող ձեռք։ Կերպարը խորհրդանշում է այն, որ մոլորակի կանաչապատումը մարդու ձեռքերում է։

Երկրորդ նամականիշի հեղինակը «ՀայՓոստի» դիզայներ Վահագն Մկրտչյանն է։ Նամականիշի մի կեսին պատկերված է անապատացված, անշունչ տարածք, երկրորդին` ծաղկող ծառ, որը խորհրդանշում է շրջակա միջավայրի վերականգնման հնարավորությունը։ -0-