ԱԺ նախագահը դատի է տվել Վազգեն Սաղաթելյանին
ԵՐԵՎԱՆ, 13 նոյեմբեր․/Նովոստի-Արմենիա /. Ազգային ժողովի նախագահ Ալեն Սիմոնյանը քաղաքացիական դատարան է դիմել «Իմնեմնիմի» փոդքասթի համահեղինակ Վազգեն Սաղաթելյանի դեմ՝ պահանջելով հրապարակային ներողություն և ֆինանսական փոխհատուցում վիրավորական հրապարակումների համար։
Ինչպես տեղեկանում ենք Datalex դատական տեղեկատվական համակարգից, Սիմոնյանը պահանջում է Վազգեն Արմենի Սաղաթելյանից հրապարակայնորեն ներողություն խնդրել հետևյալ բովանդակությամբ.
«Տեղադրել հայտարարություն իր ֆեյսբուք սոցիալական կայքի անձնական էջում՝ բոլորի համար հասանելի և տեսանելի եղանակով առնվազն հինգ աշխատանքային օր ժամկետով կամ առնվազն հինգ հազար տպաքանակ ունեցող տպագիր մամուլում, և հայտարարության վերնագիրը շարադրել հետևյալ բովանդակությամբ՝ «Ես՝ Վազգեն Արմենի Սաղաթելյանս, ներողություն եմ խնդրում Ալեն Սիմոնյանից», իսկ բովանդակությունը շարադրել այսպես՝ «08․11․2025.-ին ֆեյսբուք սոցիալական կայքի իմ անձնական էջում կատարել եմ Հրապարակումներ պարոն Սիմոնյանի վերաբերյալ: Հայտնում եմ, որ Հրապարակումներն իրենց մեջ պարունակում են վիրավորական արտահայտություններ Ազգային Ժողովի նախագահ Ալեն Սիմոնյանի վերաբերյալ, ինչի համար ներողություն եմ խնդրում պարոն Սիմոնյանից»,-գրված է համակարգում։
ԱԺ նախագահը նաև պահանջել է բռնագանձել 2 մլն դրամ՝ հրապարակումների մեջ պարունակվող վիրավորանքի համար նախատեսված փոխհատուցում, 530 հզ. դրամ դատական ծախսերի հատուցում, որից 480.000-ը փաստաբանի վարձատրության գումար, 50.000-ը՝ պետական տուրքի գումար:
Նշենք, որ Երևանի քաղաքացիական դատարանում ընդունված հայցադիմումը վերաբերում է Սաղաթելյանի՝ 2025 թվականի նոյեմբերի 8-ին Facebook-ում արած հրապարակումներին, որոնք, ըստ Սիմոնյանի, պարունակել են վիրավորական արտահայտություններ իր հասցեին։
Նշենք նաև, որ այսօր առավոտյան ձերբակալվել են «Իմնեմնիմի» հաղորդաշարի համահեղինակներ Վազգեն Սաղաթելյանը և Նարեկ Սամսոնյանը։
Նարեկ Սամսոնյանի փաստաբան Ռուբեն Մելիքյանը նշել է, որ քրեական վարույթը «Իմնեմնիմի» փոդքաստի համահեղինակների նկատմամբ նախաձեռնվել է խուլիգանության հոդվածով։
«Նախաձեռնված քրեական վարույթի շրջանակներում կատարվում են անհետաձգելի քննչական գործողություններ»,- «Նովոստի-Արմենիա»-ի հետ զրույցում ասել է ՔԿ մամուլի խոսնակ՝ Կիմա Ավդալյանը։
