Ավելի քան 15 մլն դոլար է հանգանակվել «Հայաստան» համահայկական հիմնադրամի հեռուստամարաթոնի ընթացքում

ԵՐԵՎԱՆ, 25 նոյեմբերի. /Նովոստի–Արմենիա/. «Հայաստան» համահայկական հիմնադրամի 19–րդ հեռուստամարաթոնի ընթացքում հանգանակվել և խոստացվել է 15 428 777 դոլար, հայտնում է Հայաստանի հանրային հեռուստաընկերությունը։

Նախօրեին տեղական ժամանակով 22։00–ին մեկնարկած և «Իմ Արցախ» կարգախոսը կրող հեռուստամարաթոնը տևել է 12 ժամ և հեռարձակվել հայկական հեռուստաալիքների եթերով։

Այս տարի Հեռուստամարաթոնում հանգանակված գումարները կուղղվեն Արցախի տուժած շրջանների վերականգնմանը և խաղաղ բնակչության անվտանգության և պաշտպանության ապահովմանը, ինչպես նաև Արցախի բազմազավակ ընտանիքների համար տներ կառուցելուն։ Զուգահեռ նպատակային ծրագրեր կիրականացվեն Հայաստանում և Արցախում։ -0-