ԵՐԵՎԱՆ, 8 հոկտեմբերի. /Նովոստի–Արմենիա/. Հայաստանի հանրապետական կուսակցության պատգամավոր Արմեն Աշոտյանն առաջարկում է վերահսկողության տակ վերցնել ՀՀ վարչապետ Նիկոլ Փաշինյանի օդային տրանսպորտը։
Հայկական ԶԼՄ–ներում տեղեկություն է տարածվել, որ նախորդ հանգստյան օրերին վարչապետի առաջին տեղակալ Արարատ Միրզոյանը, պետական վերահսկողության ծառայության պետ Դավիթ Սանասարյանը և կառավարության մի քանի բարձրաստիճան պաշտոնատար անձինք Երևանից ուղևորվել են Անվտանգության խորհրդի քարտուղար Արմեն Գրիգորյանի հոր հուղարկավորությանը թիվ մեկ օդանավով, որն առաջ ծառայում էր միայն հանրապետության նախագահներին։
Մայիսի վերջին Միրզոյանն օգտագործել է վարչապետի ինքնաթիռը, որպեսզի գնա Դուշանբե, որտեղ կայացել էր ԱՊՀ պետությունների կառավարության ղեկավարների խորհուրդը։
«Հաշվի առնելով վերջին շրջանում հանրության և զանգվածային լրատվամիջոցների հետաքրքրությունը և հասարակական քննարկումներն այլ բարձրաստիճան պաշտոնատար անձանց կողմից վարչապետին տրամադրվող ինքնաթիռի և ուղաթիռի օգտագործման շուրջ, նպատակահարմար ենք համարում ապահովել թափանցիկություն ՀՀ պետական բյուջեի միջոցների հաշվին կատարվող այս ծախսերի նկատմամբ», – գրել է Աշոտյանը Facebook–ի իր էջում։
Նա նշել է, որ, ղեկավարվելով ՀՀ Սահմանադրության 109-րդ հոդվածով, «Ազգային ժողովի կանոնակարգ» Հայաստանի Հանրապետության սահմանադրական օրենքի 65-րդ և 67-րդ հոդվածներով, նախաձեռնել է «Պաշտոնատար անձանց գործունեության ապահովման, սպասարկման և սոցիալական երաշխիքների մասին» Հայաստանի Հանրապետության օրենքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի շրջանառությունը:
Ըստ նրա, օրենքի նախագծով առաջարկվում է, որ ՀՀ վարչապետին տրամադրված ինքնաթիռից և ուղղաթիռից այլ բարձրաստիճան պաշտոնատար անձանց օգտվելու կարգը սահմանի ՀՀ կառավարությունը:
Նա նաև նշել է, որ որպեսզի այդ փոխադրամիջոցներից այլ բարձրաստիճան պաշտոնատար անձանց կողմից օգտվելու մասին տեղեկությունները հրապարակվեն օգտվելու փաստից ոչ ուշ քան 5 աշխատանքային օրվա ընթացքում ՀՀ վարչապետի պաշտոնական ինտերնետային կայքում:
«Հրապարակումները պետք է պարունակեն տեղեկություններ օգտագործման նպատակի, օգտագործող անձանց ցանկի և պետական բյուջեից հատկացված գումարի չափի մասին», – գրել է Աշոտյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում