ԵՐԵՎԱՆ, 13 մայիսի. /Նովոստի-Արմենիա/. ՀՀ առողջապահության նախարարության Ճառագայթային բժշկության և այրվածքների գիտական կենտրոնում բուժվող սպա Արսեն Առաքելյանն այսօր դուրս է գրվել, հաղորդում է գերատեսչության մամուլի ծառայությունը:
ՀՀ ԱՆ Ճառագայթային բժշկության և այրվածքների գիտական կենտրոնում բուժում էին անցնում Արցախում Ադրբեջանի կողմից սանձազերծված մարտական ագրեսիայի ժամանակ վիրավորված երկու զինծառայողներ:
Կենտրոնի տնօրեն Նորայր Դավիդյանի փոխանցմամբ, 28-ամյա զինծառայողը վերականգնողական բուժումը կշարունակի Արցախում` մշտական կապի մեջ գտնվելով Երևանի մասնագետների հետ:
Ապրիլյան քառօրյա պատերազմի հետևանքով Արցախի բանակի սպան դեմքի, ձեռքերի ու մարմնի այլ հատվածներում 4-րդ և 3-րդ աստիճանի այրվածքներ էր ստացել: Առաջին բուժօգնությունը ստացել էր Մարտակերտի հոսպիտալում, այնուհետև` Ստեփանակերտում, ապա նրան տեղափոխել էին Երևան:
ՀՀ ԱՆ Ճառագայթային բժշկության և այրվածքների գիտական կենտրոնում բուժումը կշարունակի 48-ամյա ԵԿՄ անդամ Գևորգ Ազոյանը, ում մոտ առկա են բազմաբեկորային վնասվածքներ: Նախորդ շաբաթ նա ենթարկվել է պլաստիկ վիրահատության: Բժիշկների հավաստմամբ` այս վիրավորը հաջորդ շաբաթվա սկզբին նույնպես դուրս կգրվի բժշկական հաստատությունից:
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտայի նմիջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
