Արցախի Հանրապետության դե յուրե ճանաչումն այլընտրանք չունի. Աշոտյան

ԵՐԵՎԱՆ, 11 մայիսի. /Նովոստի–Արմենիա/. Արցախի Հանրապետության միջազգային դե յուրե ճանաչումը պատմական իմաստով այլընտրանք չունի, չորեքշաբթի լրագրողներին ասաց Հայաստանի հանրապետական կուսակցության փոխնախագահ Արմեն Աշոտյանը։

Ինչպես կարծում է Աշոտյանը, Ղարաբաղի ճանաչումը կարող է իրականացվել երկու սցենարներով։ «Առաջին տարբերակը ենթադրում է բանակցային խաղաղ գործընթացի երկարաժամկետ սցենար ԼՂՀ ժողովրդի` ինքնորոշման իրավունքի վերականգնման շրջանակում»,– ասաց նա։ Այդ գործընթացի արդյունքում, Աշոտյանի խոսքով, ԼՂՀ–ն ճանաչվում է միջազգային իրավունքի սուբյեկտ։

Երկրորդ սցենարը, ինչպես հայտնեց ՀՀԿ փոխնախագահը, ֆորսմաժորային է և կգործարկվի Ադրբեջանի լայնամասշտաբ ագրեսիայի դեպքում, որն ամբողջովին կխաթարի բանակցային գործընթացը։ «Այդ դեպքում Հայաստանը ԼՂՀ–ն ճանաչելու այլընտրանք չի ունենա»,– կարծում է նա։

Այդ առումով Աշոտյանն ընդգծեց, որ այդ սցենարը գործի կդրվի Հայաստանում բանակցային գործընթացի երկարաժամկետ հնարավորության բացակայության և միջազգային միջնորդների ջանքերի անարդյունավետությունը փաստելու առաջին իսկ հարմար դեպքում։

Աշոտյանն ասաց, որ հայկական կողմը, որոշակի պայմաններ առաջ քաշելով բանակցային գործընթացի շարունակության կապակցությամբ, անկասկած, հարգում է ԵԱՀԿ ՄԽ միջազգային մանդատը, և այդ կապակցութամբ բանակցային գործընթացի լրիվ ձախողումն անթույլատրելի է։

Հայկական կողմը միաժամանակ համանախագահներից համապատասխան նպատակաուղղված գործողություններ, հասցեական հայտարարություններ, վստահության մթնոլորտի և կատարած հանցահործությունների հետաքննության մեխանիզմների ստեղծում և, անխոս, անվտանգության երաշխիքներ է պահանջում։

ՀՀԿ փոխնախագահի խոսքով, ագրեսիայի առաջին օրերին Ադրբեջանին հաջողվել է ինչ–որ կերպ մոլորության մեջ գցել միջազգային հանրությանը ղարաբաղյան հակամարտության գոտում լայնածավալ ռազմական գործողությունների վերկսկսման նախաձեռնողների հարցում։

«Սակայն որոշ ժամանակ անց բոլորի համար ակնհայտ դարձավ, որ ագրեսորը հենց Ադրբեջանն է, և այդ հարցը նույնիսկ չի քննարկվում»,– ավելացրեց նա։


Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-