Արփինե Հովհաննիսյանն ապագայի հավակնոտ ծրագրեր է կազմում

ԵՐԵՎԱՆ, 21 ապրիլի. /Նովոստի–Արմենիա/. Հայաստանի արդարադատության նախարար Արփինե Հովհաննիսյանը ցանկանում է մանդատ ստանալ և գնալ նոր Ազգային ժողով, գրում է «Հայկական ժամանակ» թերթը` հղում անելով սեփական աղբյուրներին։

Ինչպես նշվում է գրառման մեջ, մինչև այժմ հրապարակումներ են եղել, թե նա կարող է նշանակվել Ազգային ժողովի փոխնախագահի պաշտոնում:

«Խնդիրն այն է, որ եթե Արփինե Հովհաննիսյանը նոր ձևավորվող կառավարությունում այս անգամ էլ նշանակվի արդարադատության նախարարի պաշտոնում, ապա ընդամենը մեկ տարի հետո նորից հրաժարական է տալու, քանի որ այդ ժամանակ ավարտվելու է Սերժ Սարգսյանի նախագահության ժամկետը»,– գրում է պարբերականը։

Ավարտվելու է կառավարության լիազորությունների ժամկետն, ու այդ մարմինը վարչապետի գլխավորությամբ հրաժարական է տալու:

«Այդ ժամանակ արդեն հայտնի չէ՝ Արփինե Հովհաննիսյանը կրկին կվերանշանակվի՞ այդ պաշտոնում, թե՞ կմնա ձեռնունայն: Իսկ մայիսին խորհրդարան գալով, անկախ այն հանգամանքից՝ փոխնախագահ, հանձնաժողովի նախագահ կնշանակվի, թե կլինի շարքային պատգամավոր, միևնույն է, առաջիկա հինգ տարիներին նա այդ պաշտոնում կլինի»,– գրում է թերթը։ -0-