ԵՐԵՎԱՆ, 21 ապրիլի. /Նովոստի–Արմենիա/. «Armenia» նոր ավիաընկերությունն ապրիլի 21–ի երեկոյան կիրականացնի իր առաջին չվերթը Երևան–Թել Ավիվ ուղղությամբ, հինգշաբթի «ԱՌԿԱ» գործակալությանը հայտնեց ավիաընկերության փոխտնօրեն Գևորգ Խաչատրյանը։
«Ինչպես նախկինում հայտարարել ենք, Երևան – Թել Ավիվ չվերթերը կիրականացվեն ապրիլի 21–ից, շաբաթը երկու անգամ։ Ամեն ինչ ըստ ժամանակացույցի է, այսօր 21։10–ին Boeing 737 օդանավը կմեկնի «Զվարթնոց» օդանավակայանից»,– ասաց նա։
Խաչատրյանը նշեց, որ տվյալ ուղղության նկատմամբ հետաքրքրությունը բարձր է, քանի որ դա ուղիղ չվերթ է։ «Այդ իմաստով ավելի շահեկան դիրքում ենք, քան մյուս օդանավակայանները, որոնք հարակից չվերթեր են կատարում։ Բացի այդ, գնային տեսանկյունից մեր առաջարկն ավելի շահավետ է այլ ավիաընկերությունների համեմատ»,– նշեց նա։
Խաչատրյանի խոսքով, «Armenia»–ն հետագայում ծրագրում է թռիչքներ իրականացնել դեպի եվրոպական քաղաքներ, ինչի մասին հասարակայնությանը կիրազեկվի լրացուցիչ։ «Դեպի Եվրոպա թռիչքներ կլինեն անպայման, պարզապես, այս պահին որոշ հարցեր են լուծվում»,– նշեց նա։
«Armenia» ավիաընկերության հիմնադիրներն են` Աշոտ Թորոսյանը (բաժնետոմսերի 51%), Թամազ Գաիաշվիլին (25%) և Ռոբերտ Հովհաննիսյանը (24%)։ Գաիաշվիլին «Airzena» վրացական ավիաընկերության տնօրինության խորհրդի հիմնադիրն ու նախկին նախագահն է, իսկ Ռոբերտ Հովհաննիսյանը` նրա նախկին տեղակալը։
«Armenia»–ն պատրաստվում է անցնել կանոնավոր չվերթերի իրականացմանը դեպի Թեհրան, Դուբայ, Պրահա, Կիև, Մինսկ, Բարեսլոնա, Լոնդոն և Լարնակա։
Գերակա ուղղություններից են` Ռուսաստանը (Մոսկվա, Սոչի, Դոնի Ռոստով, Միներալնիյե վոդի, Սամարա), իսկ եվրոպական ուղղություններից նախատեսվում են թռիչքներ Գերմանիա և Իտալիա։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
