Արմեն Աշոտյանին հաջորդողը չի համբերում

ԵՐԵՎԱՆ, 12 փետրվարի. /Նովոստի–Արմենիա/. Հայաստանի հանրապետական կուսակցության և Դաշնակցության միջև նոր կոալիցիայի շրջանակում Հայաստանի կրթության և գիտության նախարարի պաշտոնում Արմեն Աշոտյանին կփոխարինի Լևոն Մկրտչյանը, ով արդեն երեք անգամ զբաղեցրել է այդ պաշտոնը, գրում է «Ժողովուրդ» թերթը։

Թերթի տեղեկություններով, Մկրտչյանը շտապում է հնարավորինս շուտ ստանձնել իր պարտավորությունները։ Ըստ պտտվող լուրերի, նախօրեին նա նույնիսկ հասցրել է նախարարությունում իրեն նվիրված մարդկանց հետ խորհրդակցություն անցկացնել, որի ընթացքում ծանոթացրել է աշխատակիցներին իր ծրագրերի հետ։

«Սակայն անձնակազմին առավել հետաքրքիր էին ոչ թե նախարարի ծրագրերը, այլ կադրային քաղաքականությունը»,– գրում են հոդվածի հեղինակները և հիշեցնում, որ Աշոտյանը պաշտոնը ստանձնելիս «կադրային զտումներ» չի կատարել։

Խորհրդարանի փոխխոսնակ, ՀՀԿ գործադիր մարմնի անդամ Էդուարդ Շարմազանովը չորեքշաբթի հայտնել է, որ ՀՀԿ–ն և Դաշնակցությունը համագործակցության նախնական պայմանավորվածություն են ձեռք բերել, իսկ մյուս մանրամասները հայտնի կդառնան մինչև շաբաթվա վերջ։

ԶԼՄ–ները հայտնում են, որ պայմանավորվածությունների շրջանակում ՀՅԴ–ն կստանա արդարադատության, կրթության և գիտության, ինչպես նաև առանձին կառույցում առանձնացված տարածքային կառավարման նախարարության պորտֆելները։ -0-