Արմավիրի մարզպետի խորհրդականին առանձնակի դաժանությամբ են սպանել. ինչո՞ւ են սպանել պաշտոնյային (ՄԱՆՐԱՄԱՍՆԵՐ)

ԵՐԵՎԱՆ, 26 հուլիսի./Նովոստի–Արմենիա/. Արմավիրի մարզպետի խորհրդական 52-ամյա Մանուկ Սիմոնյանի դին հայտնաբերվել է նրա բջջային հեռախոսի շնորհիվ, որը գյուղացիներից մեկը գտել է դիակից մի քանի մետր հեռավորության վրա։

Ինչպես հաղորդում է hraparak.am–ը, Սիմոնյանին սպանել են առանձնակի դաժանությամբ, նրա մարմինը եղել է երկաթներով կապկպված, իսկ գլխին ծանր քար է դրված եղել, մարմինը գտել են կիսանեխած վիճակում։

Աղբյուրի համաձայն` այս սահմռկեցուցիչ սպանությունը գյուղացիների շրջանում տարաբնույթ խոսակցությունների տեղիք է տվել, վարկածներից մեկի համաձայն՝ նման դաժան սպանությունը հնարավոր է տեղի ունեցած լինի նեղ անձնական, օրինակ՝ խանդի հողի վրա։ Սարդարապատի գյուղապետ Բաբկեն Վարդանյանը բացառել է խանդի հողի վրա սպանության վարկածը․ «Նա առաքինի անձնավորություն էր, տուն ուներ, ընտանիք, դրանք ուղղակի բամբասանքներ են։ Մենք բոլորս ապշած ենք կատարվածից»։

Մյուս վարկածն էլ այն է, որ հնարավոր է տեղի ունեցածը կապված լինի նրա աշխատանքային գործունեության հետ։ Սիմոնյանը մարզպետի աջ ձեռքն էր, նրան ընկալում էին որպես Աշոտ Ղահրամանյանի «աչքերն ու ականջները» մարզպետարանում, ինչը բնականաբար որոշ աշխատակիցների սրտով չէր, թեև այս հողի վրա նման դաժան սպանությունը խիստ անհավանական է։


Պարբերականը նշում է, որ մարզպետի հետ կապվելու ջանքերն ապարդյուն են անցել, նա հեռախոսազանգերի չի պատասխանում։

Քննչական կոմիտեի տեղեկատվության համաձայն, Հուլիսի 22-ին ժամը 22։00- 23:00-ի Մանուկ Սիմոնյանը դուրս էր եկել տանից և այլևս չէր վերադարձել: Մ. Սիմոնյանին մի տղամարդ կանչել է, ինչից հետո նա դուրս է եկել տանից՝ առանց ասելու, թե ուր է գնում:

Ձեռնարկված միջոցառումների արդյունքում հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան -Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում։ -0-