ԵՐԵՎԱՆ, 23 նոյեմբերի․ /Նովոստի-Արմենիա/․ ՀՀ ՊՆ շենքի մոտ արդեն մի քանի ժամ է՝ ընթանում է Արցախում ռազմական գործողությունների ընթացքում անհայտ կորածների հարազատների բողոքի ակցիան։
Ցուցարարների մոտ դուրս եկավ վարչապետի օգնական Նաիրի Սարգսյանը և հայտնեց այդ ուղղությամբ իրականացվող գործողությունների մասին։
«Այսօր վարչապետի մոտ ընդլայնված կազմով խորհրդակցություն է եղել՝ անհայտ կորած տղաների հետ կապված հարցով։ Վարչապետը որոշում է կայացրել, որ փոխվարչապետի գլխավորությամբ միջգերատեսչական հանձնաժողով ձևավորվի, որը շատ արագ պետք է զբաղվի անհայտ կորած տղաների հարցերով, և բոլոր ծնողներին պետք է հայտնեն, թե իրենց երեխաները որտեղ են գտնվում, ինչ վիճակում են, երբ է հնարավոր նրանց հայտնաբերել. ժամկետների, սոցիալական երաշխիքների հետ կապված բոլոր հարցերը պետք է մաքսիմալ կարճ ժամկետներում լուծվեն»-, ասաց նա։
Խորհրդականը նաև հայտնել է, որ Փաշինյանն իրեն հանձնարարել է ՊՆ-ի շենքի դիմաց հավաքվածների ցուցակ կազմել՝ հեռախոսահամարներով՝ անձնական հանդիպում կազմակերպելու համար։
«Հենց այս շաբաթ վարչապետի մոտ հանդիպումներ կնախաձեռնենք։ Քանի որ մեծ թվով են քաղաքացիները, այդ պատճառով մի քանի հանդիպումներ կլինեն, որպեսզի բոլորը կարողանան ներկա գտնվել, տալ իրենց հարցերը և համապատասխան պատասխաններ ստանալ»,- ասաց Սարգսյանը։
Հավաքվածները չէին թաքցնում իրենց վրդովմունքը, որ անհայտ կորած զինծառայողների հարցերով հատուկ հանձնաժողով ստեղծելու որոշումն այդքան ուշ է ընդունվել:
«Մոտ 50 օր է, ինչ մեր երեխաներից տեղեկություն չկա, և դուք միայն հիմա՞ եք պատրաստվում ինչ-որ բան ձեռնարկե», - ասացին հանրահավաքի մասնակիցները:
Անհայտ կորած զինծառայողների ծնողների կողմից սա առաջին ցույցը չէ: Ավելի վաղ նրանք արդեն հավաքվել էին Պաշտպանության նախարարության շենքի մոտ՝ պահանջելով նրանց տեղեկություններ տրամադրել զինծառայողների մասին:-0-