Անկախության օրը Երևանում. «սելֆիի ժամ», զինվորական նվագախմբերի շքերթ և նկարչություն կավճով (ՖՈՏՈՌԵՊՈՐՏԱԺ)

Վերնիսաժ և ազգագրական տաղավարներ



Հայաստանի պատմության ազգային թանգարանի և պատկերասրահի շենքի մոտ կազմակերպվել է հայ ժամանակակից նկարիչների և ճարտարապետների ստեղծագործությունների ինքնատիպ «Վերնիսաժ»։ Նկարներն ու քանդակները ներկայացնում են ոճերի լայն շրջանակ` ավանդական հայկական դասականից մինչև պոստմոդեռն։



Հրապարակում տեղադրվել են էթնոգրաֆիկ տաղավարներ, որտեղ տեղական կազմակերպությունները ներկայացնում են թատերականացված բեմադրություններ` հայկական ավանդական ընտանիքի կյանքից։ Այստեղ կարելի է համտեսել հայկական ավանդական ճաշատեսակներ, լուսանկարվել հայկական տարազով։

Փողային նվագախմբերի շքերթ



Տոնական միջոցառումներին մասնակցեցին նաև ՀՀ ՊՆ–ի, ոստիկանության, ԱԻՆ–ի և ԱԱԾ–ի փողային նվագախմբերը, որոնք, նվագելով, քայլերթով անցան Հանրապետության Հրապարակով։ Վերջում նրանք համատեղ կատարեցին հայ կոմպոզիտորների մի քանի ստեղծագործություններ` հայտնի զինվորական դիրիժոր, գնդապետ Արմեն Պողոսյանի գլխավորությամբ։

Համերգային միջոցառումներ

Հրապարակում տեղադրվել է երկու բեմ երաժշտական և թատերական խմբերի ելույթների համար։ Այս տարի միջոցառման առանձնահատկությունն այն է, որ տոնական միջոցառումներ կազմակերպվել են քաղաքի տարբեր հատվածներում։ Ողջ քաղաքում հնչում է երաժշտություն, իսկ երեկոյան երևանյան երկինքը կլուսավորվի տոնական հրավառությամբ։

Տոնի պատմությունը



Հայաստանն այսօր` սեպտեմբերի 21–ին, տոնում է անկախության 27–ամյակը։ Հայաստանի Գերագույն խորհրդի որոշմամբ, 1991թ. սեպտեմբերի 21-ին հանրաքվե անցկացվեց՝ ԽՍՀՄ կազմից դուրս գալու և անկախ պետականություն հաստատելու վերաբերյալ: Ընտրելու իրավունք ունեցող քաղաքացիների 99%-ը կողմ էր քվեարկել: Երկու օր անց հանրապետության Գերագույն Խորհուրդը Հայաստանը հռչակեց անկախ, ինքնիշխան հանրապետություն։ Ներկայիս Հայաստանն ընդունված է անվանել Երրորդ Հանրապետություն: Նրանից առաջ եղել են Առաջին Հանրապետությունը (1918-1920 թթ.) և Հայկական ԽՍՀ-ն (1920-1991 թթ.)։ Հայկական պետականությունը վերականգնվել է իր գոյության և ազգային ինքնության պահպանման համար ժողովրդի բազմադարյա պայքարի արդյունքում–0–