Ադրբեջանի հարձակումն Արցախի ՊԲ–ի համար անակնկալ չէր. պատգամավոր

ԵՐԵՎԱՆ, 4 ապրիլի. /Նովոստի-Արմենիա/. Ադրբեջանի հարձակողական գործողությունները Ղարաբաղի պաշտպանության բանակի համար անակնկալ չէին, երկուշաբթի լրագրողներին ասաց ԱԺ պագտամավոր Ալեքսանդր Արզումանյանը:

«Հակառակորդին տրվեց համարժեք պատասխան, թշնամին բոլոր դիրքերից դուրս շպրտվեց», - ընդգծեց Արզումանյանը: Նրա խոսքով, հայկական կողմը, սկսած 1994 թ.-ից, միշտ պատրաստ է նման սադրանքների:

Նա նշեց, որ այս պահի դրությամբ խաղաղության պարտադրման գործողություն է ընթանում։ «Մեզ ոգեշնչում է մեր հասարակության համախմբվածությունը», - ավելացրեց Արզումանյանը:

Նա ընդգծեց, որ Ադրբեջանի համար դա կդառնա վառ օրինակ, թե ինչպես է հայ ազգը պատրաստ հայրենիքի պաշտպանության համար մի կողմ դնել բոլոր տարաձայնությունները:

Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով:

ԼՂՀ ՊՆ–ի մամուլի ծառայության հաղորդմամբ` ապրիլի 3-ի լույս 4-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը ականանետերից ու հրանոթներից շարունակել է արկակոծել ՊԲ առաջնային դիրքերն ու մերձակա հայկական բնակավայրերը։ Ադրբեջանական զորքերն առավոտյան ժամը 07:00-ի սահմաններում առավել ինտենսիվ հրետակոծություններ են սկսել շփման գոտու հարավարևելյան և հյուսիսարևելյան ուղղություններով։

Հակառակորդի ագրեսիվ գործողությունները ճնշելու ուղղությամբ ՊԲ առաջապահ ուժերը ձեռնարկում են բոլոր անհրաժեշտ միջոցները և վստահաբար իրականացնում իրենց առջև դրված մարտական խնդիրները։ Օպերատիվ տվյալներով` մարտական գործողությունների ընթացքում ոչնչացվել է 2 ուղղաթիռ, շուրջ 20 տանկ, «Գրադ» տիպի 1 կայանք, 5 միավոր այլ զրահատեխնիկա, այդ թվում` 1 ԲՄՊ, 1 միավոր ինժեներական տեխնիկա և 6 անօդաչու սարք։ Ադրբեջանական զինուժը տվել է 200-ից ավելի մարդկային կորուստ: Հայկական կողմը կորցրել է մեկ տանկ, ունի 18 զոհ, մոտ 40–ը վիրավոր է։ –0–