Երևանում տեղի կունենա ԱՊՀ պետությունների գլխավոր դատախազների համակարգող խորհրդի նիստը
ԵՐԵՎԱՆ, 4 հոկտեմբերի․/Նովոստի-Արմենիա/․ Երևանում տեղի կունենա ԱՊՀ անդամ երկրների գլխավոր դատախազների համակարգող խորհրդի 34-րդ նիստը։ Այս մասին հայտնում է ՌԴ գլխավոր դատախազությունը։
Հանդիպմանը մասնակցելու նպատակով Երևան է ժամանել ՌԴ գլխավոր դատախազ Իգոր Կրասնովը, ով Համակարգող խորհրդի նախագահողն է, որը ստեղծվել էր ջանքերը համաձայնեցնելու և միավորելու համար, ինչպես նաև համակարգելու ԱՊՀ անդամ պետությունների դատախազությունների գործողություններն ու համագործակցությունը օրենքի գերակայության ապահովման, քաղաքացիների իրավունքներն ու ազատությունները հարգելու և հանցավորության դեմ պայքարի ոլորտներում։
Հանդիպմանը կմասնակցեն Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի գլխավոր դատախազությունների պատվիրակությունները, ինչպես նաև ԱՊՀ մասնակից պետությունների գլխավոր դատախազների համակարգող խորհրդի քարտուղարության ներկայացուցիչներ։
Ռուսաստանի վերահսկողական գործակալության ղեկավարը մի շարք հանդիպումներ կանցկացնի օտարերկրյա գործընկերների հետ, որոնց ընթացքում կողմերը կկարողանան կարծիքներ փոխանակել առանցքային հարցերի շուրջ և համատեղ որոշումներ մշակել աշխատանքի արդյունավետությունը բարձրացնելու համար։
ԱՊՀ անդամ պետությունների գլխավոր դատախազների համակարգող խորհուրդը ստեղծվել է 1995 թվականին, իսկ 2000 թվականին ստացել է Անկախ Պետությունների Համագործակցության միջպետական մարմնի կարգավիճակ։
Դրա ստեղծման նախադրյալն իրավական դաշտում պատմական երկարամյա համատեղ գործունեությունն էր, ինչպես նաև ԽՍՀՄ փլուզումից հետո ստեղծված պայմանները, որոնք կանխորոշեցին հանցավորության, հատկապես՝ կազմակերպված և անդրազգային հանցագործությունների դեմ պայքարում ամենօրյա համագործակցության անհրաժեշտությունը:
