Երևանում սկսել են տուգանել պոլիէթիլենային չթույլատրված տոպրակների համար

ԵՐԵՎԱՆ, 20 հունվարի./Նովոստի-Արմենիա/. Պոլիէթիլենային չթույլատրված տոպրակների օգտագործման համար տնտեսվարողները տուգանվում են, հաղորդում է Երևանի քաղաքապետարանը:

Հունվարի 1-ից առևտրի օբյեկտներում մինչև 50 միկրոն հաստությամբ պոլիէթիլենային պարկերի և տոպրակների օգտագործումն արգելված է՝ բացառությամբ կշռափաթեթավորման համար նախատեսված և երկրորդային հումքից պատրաստված տոպրակների:

«Տնտեսվարողներին շուրջ 2 տարի ժամանակ էր տրվել հրաժարվել պոլիէթիլենային տոպրակներից և նոր՝ բնապահպանական տեսանկյունից անվտանգ լուծումներ գտնել», - նշվում է գերատեսչության հաղորդագրության մեջ:

Երևանի քաղաքապետարանի և վարչական շրջանների աշխատակիցներն այսօրվանից ստուգայցեր են իրականացնում, օրինազանցներին՝ տուգանում:

Քաղաքապետարանից հայտնում են, որ հսկողությունը լինելու է ամենօրյա:-0-