Երևանի կենդանաբանական այգում արջի քոթոթ է բնակություն հաստատել (ՖՈՏՈ)

ԵՐԵՎԱՆ, 26 հունիսի./Նովոստի–Արմենիա/. Հրազդանից Երևանի կենդանաբանական այգի գորշ արջի քոթոթ է տեղափոխվել։

Ինչպես նշվում է այգու Facebook–յան էջում, սույն թվականի հունիսի 25-ին Բնապահպանության և ընդերքի տեսչական մարմնի միջնորդությամբ Հրազդանից ԵԿԱ է տեղափոխվել գորշ արջ:

«Կենդանին արու է, 6 ամսական, քաշը՝ 8 կիլոգրամ: Մասնագետի խոսքով՝ քաշը տվյալ հասակի քոթոթի համար բավականին քիչ է, ինչը խոսում է կենդանու ոչ լիարժեք խնամքի մասին: Կենդանու ծագման վերաբերյալ ստույգ տվյալներ չկան: Դատելով կենդանու վարքագծից՝ արջը երկար ժամանակ խնամվել է մարդու կողմից. չի վախենում մարդկանցից և կեր է պահանջում: Գորշ արջը տվյալ տեսակին ոչ բնորոշ վարքագիծ է դրսևորում՝ ծծում է թաթը, նյարդային շարժումներ անում: Վարքագծային շեղումների առաջացման պատճառը մարդկանց կողմից ոչ գրագետ խնամքն ու կերակրումն է», – նշվում է այգու տարածած հաղորդագրության մեջ:

Ներկայումս կենդանին գտնվում է կարանտինային բաժանմունքում, կատարվում են ամենօրյա հետազոտումներ, նախատեսվում են նաև լաբորատոր հետազոտություններ:

Այգու հաղորդմամբ, արջի առողջական վիճակի մասին լիարժեք տեղեկատվություն հնարավոր կլինի տրամադրել 1 ամսից՝ կարանտինային ժամանակահատվածի ավարտից հետո:–0–