Երևան, հնարավոր է, բերվեն 12 մետրանոց 100 ավտոբուսներ
«Հասարակական տրանսպորտի բեռնաթափման նպատակով նախատեսվել է համալրել ավտոբուսային պարկը և այդ նպատակով առաջիկա ամիսներին մայրաքաղաք կներկրվի միջին դասի ավտոբուսների նոր խմբաքանակ (211 հատ)», – նշեցին քաղաքապետարանից։
Երևանի քաղաքապետ Հայկ Մարությանը նախօրեին ասել էր, որ Երևանի 211 նոր ավտոբուսները հոկտեմբերի 10-ին կլինեն Փոթիի նավահանգստում։ Նրանք բերվում են Չինաստանից։
«Եթե ամեն ինչ նախատեսված գրաֆիկով գնա, ավտոբուսները հոկտեմբերի 10-ին կլինեն Փոթիի նավահանգստում: Մինչև Երևան հասնելու համար կպահանջվի հավանաբար շուրջ 10 օր», - նշել էր Մարությանը:
«Նոր երթուղիների քանակի, դրանց կազմակերպման հարցին հնարավոր կլինի անդրադառնալ վերը նշված ավտոբուսների ներկրման գործընթացի ավարտից հետո: Ընդհանուր առմամբ նոր ավտոբուսները կգործեն Երևանի բոլոր վարչական շրջաններում», – նշեցին քաղաքապետարանից։
Քաղաքապետարանից անդրադարձան նաև հասարակական տրանսպորտի ուղևորահոսոքին։
Մասնավորապես, մայրաքաղաքի հասարակական տրանսպորտի առանձին տեսակներով օրական միջին հաշվով տեղափոխվում է. մետրոպոլիտենով՝ 62 500 ուղևոր, «Երևանի ավտոբուս» ՓԲԸ-ի շարժակազմերով՝ 76 500 ուղևոր, տրոլեյբուսներով՝ 10 000 ուղևոր:
«Մասնավոր ավտոբուսների (միկրոավտոբուսների) մասով հաշվառումը մոտավոր է», – նշեցին քաղաքապետարանից:–0–
