Ոստիկանները դաժան ծեծի են ենթարկել Մալաքյան եղբայրներին, Գևորգ Ղազարյանը փակագծեր է բացում (ՎԻԴԵՈ)
11:28
03 Սեպտեմբերի 2020
ԵՐԵՎԱՆ, 3 սեպտեմբերի./Նովոստի–Արմենիա/. Հայաստանի ֆուտբոլի ազգային հավաքականի հարձակվող Գևորգ Ղազարյանն անդրադարձել է Մալաքյան եղբայրների հետ տեղի ունեցած միջադեպին։
Загружается новость ... "Лево"
Նա կոչով դիմել է այն մարդկանց, ովքեր անտարբեր չեն Գոռ և Էդգար Մալաքյանների գործով։
«Ուզում եմ մի քանի թեմաների մասին խոսել։ Առաջինը, շատ հրապարակումներ եմ տեսնում, որտեղ ասվում է, որ օրենքը հավասար է բոլորի համար, և կապ չունի, թե ինչ մասնագիտության տեր ես։ Իրականում համաձայն եմ, կապ չունի, թե ինչ մասնագիտություն ունես, այդ թվում են նաև ոստիկանները, որոնք անօրինաբար դաժան ծեծի են ենթարկել Գոռին և Էդգարին։ Գոռը նույնիսկ ունի տեսողության հետ խնդիրներ, որը կարող է անդրադառնալ իր գործունեության վրա», – ասել է Ղազարյանը։
Նա նաև խոսել է այն մարդկանց մասին, ովքեր շատ կտրուկ են արտահայտվում առանց իրականությունն իմանալու։
«Ուզում եմ ասել, որ շատ կայքերի գրածները 99 տոկոսով չեն համապատասխանում իրականությանը։ Գոռն ու Էդգարը չէին կարող 2 հոգով ծեծել 4, 5, 6 ոստիկանների, հակառակը` ոստիկաններն են նրանց դաժան ծեծի ենթարկել», – նշել է Ղազարյանը։
Նշենք, որ նախօրեին երեկոյան ազգային հավաքականի ֆուտբոլիստներ Մալաքյան եղբայրներն ազատ են արձակվել ոստիկանության ՁՊՎ–ից։
ՔԿ–ն հաղորդագրություն էր տարածել` ներկայացնելով դեպքի բոլոր հանգամանքները։ Քննիչը եղբայրներին կալանավորելու միջնորդություն էր ներկայացրել։
ՀՖՖ նախագահ Արմեն Մելիքբեկյանն իր հերթին դիմել է իրավասու պաշտոնատար անձանց՝ իր մտահոգությունը հայտնելով Էդգար և Գոռ Մալաքյան եղբայրների և իրավապահ մարմինների ներկայացուցիչների մասնակցությամբ 2020 թվականի օգոստոսի 30-ին Երևանի կենտրոնում գրանցված միջադեպի կապակցությամբ: Իր նամակում ՀՖՖ նախագահն ակնկալում է դեպքի անաչառ քննություն և խնդրում է իրավասու պաշտոնատար անձանց քննարկել Մալաքյան եղբայրների նկատմամբ ազատությունից զրկելու հետ չկապված այլ խափանման միջոցների կիրառման հնարավորությունը: Հայաստանի ֆուտբոլի ֆեդերացիայի պատասխանատու պաշտոնատար անձինք պատրաստակամություն են հայտնել հանդես գալ նաև անձնական երաշխավորությամբ:–0–
