ԵՐԵՎԱՆ, 16 մայիսի./Նովոստի–Արմենիա/. Ոստիկանները բերման են ենթարկում ընդդիմության կազմակերպած ավտոերթերի մասնակիցներին դիտավորյալ խցանումներ առաջացնելու համար։
Երևանում, չնայած հորդառատ անձրևին և ջերմաստիճանի զգալի նվազմանը, միանգամից մի քանի ավտոշարասյուն երթեր է կազմակերպել, որոնց մասին նախօրեին հայտարարել էր ընդդիմությունը։
Մեքենաները, որոնց վրա ամրացված են Հայաստանի և Արցախի դրոշները,բարձր ազդանշանները միացրած շարժվում են Երևանի փողոցներով։ Երթևեկությունը դժվարացած է, որոշ շրջաններում ոստիկանները փակել են ցուցարարների ճանապարհը։
Նախօրեին ՀՀ ԱԺ փոխխոսնակ, «Հայաստան» ընդդիմադիր խմբակցության ներկայացուցիչ Իշխան Սաղաթելյանը հրապարակել է այն հասցեները, որտեղից այսօր մեկնարկել են ավտոերթերը:
1. Աշտարակի խճուղի` Կարմիր խաչի գրասենյակի դիմաց
2. Արտաշատի խճուղի` Կոնտինենտալի դիմաց
3. Երևան-Աբովյան մայրուղի` Փարավոն ռեստորանային համալիրի մոտ
4. Արգավանդի խճուղի` օդանավակայան տանող ճանապարհի գազալցակայանի մոտ
5. Արինբերդի խճուղի (Տեցի կռուգ)
Սաղաթելյանը կիրակի հանրահավաքի ժամանակ հայտարարեց, որ «Դիմադրություն» շարժումն առաջիկա օրերին պետք է իր ընդդիմադիր գործունեության մեջ դուրս կգա նոր մակարդակի վրա: Այսպես, երկուշաբթի՝ մայիսի 16-ին առավոտյան 08:00-ից անցկացվելու են ավտոերթեր և անհնազանդության ակցիաներ ողջ քաղաքում, ընդհուպ մինչև մետրոյի արգելափակում: Երեքշաբթի՝ մայիսի 17-ին կրկին ժամը 08:00-ից կմեկնարկեն անհնազանդության ակցիաները, որոնք կկազմակերպվեն 80-100 խմբերի ուժերով: Նույն օրը 19:30-ին Ֆրանսիայի հրապարակում տեղի կունենա հանրահավաք:-0-