ԵՐԵՎԱՆ, 9 հունվարի./Նովոստի–Արմենիա/. «Իմ քայլը» խմբակցության պատգամավոր Սոֆյա Հովսեփյանը դուրս է եկել խմբակցությունից։
Այս մասին նա հայտնել է Facebook–յան իր էջում։
«Սիրելի՛ հայրենակիցներ որոշում եմ կայացրել դուրս գալ իմ «Իմ քայլը» խմբակցությունից և այսուհետ գործելու եմ որպես անկախ պատգամավոր :
Որոշումը կայացրել եմ երկար մտածելուց հետո: Սա ամենևին չի նշանակում, որ որևէ կերպ կթերանամ իմ որդեգրած առաքելության իրականացման գործում, այլ կշարունակեմ գործել նույն նվիրումով, ինչպես գործել եմ մինչ այս պահը», – նշել է Հովսեփյանը:
Նա ընդգծել է, որ ցանկացած ազգանվեր և պետականամետ գործին լինելու է նպաստող, ինչպես եղել է, և դեմ է լինելու այն բոլոր հարցերին, որոնք չեն բխելու մեր երկրի ու ազգի շահերից:
«Խնդրում եմ ինձ վստահող անձանց՝ չկաշկանդվել ցանկացած հարցում դիմելու և ակնկալելու իմ աջակցությունը: Միևնույն ժամանակ ներողություն եմ խնդրում ինձ իրենց ձայնը վստահած հայրենակիցներիցս, որ սույն որոշումը ձեզ հետ չեմ քննարկել, սակայն վստահ եմ, որ ըմբռնումով կմոտենաք», – նշել է Հովսեփյանը:
Նշենք, որ Հովսեփյանը պատգամավոր Նազելի Բաղդասարյանի հետ ակտիվորեն ներգրավված է Ադրբեջանից հայ գերիների վերադարձի գործընթացում։
Մինչև պատգամավոր ընտրվելը Հովսեփյանը զբաղեցրել է Շիրակի մարզպետի տեղակալի պաշտոնը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում