ԵՐԵՎԱՆ, 20 նոյեմբերի./Նովոստի–Արմենիա/. Վիվա–ՄՏՍ ընկերությունը պատասխանել է
ARKA-Telecom հեռահաղորդակցական պորտալի հարցմանը, որը վերաբերում է ԱՄՆ–ի հայցով ընկերությունում սկսած ստուգումներին։
«Ինչպես նշված է ՄՏՍ խմբի տարեկան նախորդ հաշվետվություններում և 20-F ձևաչափով հաշվետվության մեջ, 2019թ. մարտին ՄՏՍ-ը ստորագրել է հաշտության համաձայնագիր ԱՄՆ Արդարադատության դեպարտամենտի (DOJ) և հրաման՝ ԱՄՆ Արժեթղթերի և բորսաների հանձնաժողովի (SEC) հետ, որոնց համաձայն՝ 2019 թ. սեպտեմբերից ՄՏՍ-ում ներդրվել է անկախ Քոմփլայենս մոնիթորինգի համակարգ: Այն նախատեսում է կազմակերպության ներսում հակակոռուպցիոն քաղաքականությունների, կանոնակարգերի և ընթացակարգերի կատարելագործում», – նշել են մամուլի ծառայությունից։
Նշվում է, որ Անկախ Քոմփլայենս մոնիթորինգի իրականացման ընթացքում հայտնաբերվել են ՄՏՍ-ի հայաստանյան դուստր–ձեռնարկությանն առնչվող առանձին գործառնություններ, որոնց մասին տեղեկություններն աշխատանքային կարգով տրամադրվել են ԱՄՆ Արդարադատության դեպարտամենտին ու ԱՄՆ Արժեթղթերի և բորսաների հանձնաժողովին: ԱՄՆ Արդարադատության դեպարտամենտն ու ԱՄՆ Արժեթղթերի և բորսաների հանձնաժողովը դիմել են վերը նշված գործառնությունների վերաբերյալ լրացուցիչ տեղեկություններ ստանալու նպատակով, և ՄՏՍ-ը նախաձեռնել է ստուգման գործընթաց:
«Այս փուլում մենք չենք կարող նախապես տեղեկություններ տրամադրել ստուգման գործընթացի արդյունքների ու ավարտի ժամկետների վերաբերյալ: ՄՏՍ–ը, որպես հանրային ընկերություն, բաց ու հասանելի է դարձնում ցանկացած այնպիսի տեղեկատվություն, որը կվերաբերի կարգավորող մարմինների հարցումներին։ Այս փուլում վաղաժամ ենք համարում ստուգման ընթացքի ու բովանդակության վերաբերյալ ավելի մանրամասն մեկնաբանության տրամադրումը։ ՄՏՍ–ը շարունակում է զարգացնել համապատասխանության (Compliance) համակարգը, այդ թվում նաև՝ ընկերության հայաստանյան դուստր-ձեռնարկությունում», – նշվում է հայտարարության մեջ։
Viva-MTS–ի մասին
Viva-MTS ընկերությունը («ՄՏՍ Հայաստան» ՓԲԸ) Հայաստանում բջջային կապի առաջատար օպերատորն է, որն ունի ամենալայն ցանցն ու տրամադրում է ձայնային և տվյալների փոխանցման ծառայությունների լայն շրջանակ։ Առաջնահերթ համարելով բաժանորդների համար առավելագույն որակյան ծառայությունների սկզբունքները` ընկերությունը հիմնադրման պահից 2005թ.– ի հուլիսի 1–ից կարճ ժամանակահատվածում կարողացել է ստեղծել համազգային ցանց` բաժանորդների մեծ բազայով։
Viva-MTS–ը նորարարությունների ոլորտի առաջատարն է, կիրառում է այդ ոլորտի բոլոր լուծումները` ի շահ երկրի բջջային կապի շուկայի։ Ընկերությունն իր գործունեության իրականացման ժամանակ ղեկավարվում է ISO 26000 (Սոցիալական պատասխանատվություն), ISO/IEC 27001:2013 (Տեղեկատվական անվտանգության կառավարման համակարգ), ինչպես նաև ISO 37001 (Կոռուպցիայի և կաշառակերության կանխարգելման միջազգային չափորոշիչներ) ստանդարտներով։–0–
