Վիկտոր Սողոմոնյանը մեկնաբանել է «Էրեբունի պլազայում» գրանցված միջադեպը

ԵՐԵՎԱՆ, 23 հունվարի./Նովոստի–Արմենիա/. ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը լրագրողներին մեկնաբանել է «Էրեբունի պլազայում» գրանցված միջադեպը։

«Այն պահին, երբ կրակոցները եղել են, աշխատակիցները գրասենյակում չեն եղել։ Որքանով է միջադեպը կապված նախագահ Քոչարյանի գրասենյակի հետ, ես դա չգիտեմ։ Եթե առնչվում է մեզ, տեղեկություն կտարածեմ։ Ռոբերտ Քոչարյանի գրասենյակն «Էրեբունի պլազայում» գործող բազմաթիվ հիմնարկներից մեկն է», – նշեց Սողոմոնյանը։

Մեկնաբանելով Քոչարյանի աջակիցների կողմից հնչող տեղեկություններն այն մասին, թե այս միջադեպն ուղղված էր գրասենյակի գործունեություն դեմ` Սողոմոնյանը նշեց. «Եթե ես լինեի մեր աջակիցներից մեկը, գոիցե ես էլ ինչ–որ բան մեկնաբանեի։ Ես նախագահ Քոչարյանի գրասենյակի ղեկավարն եմ, պաշտոնական ներկայացուցիչ եմ և իրավունք չունեմ ասեկոսեներ մեկնաբանել»։

Նշենք, որ այսօր կրակոցներ են հնչել Հանրապետության Հրապարակում գտնվող «Էրեբունի պլազայում», որտեղ գտնվում է Ռոբերտ Քոչարյանի գրասենյակը։

Ոստիկանության հաղորդմամբ, ժամը 14.40-ին ոստիկանությունում ահազանգ է ստացվել, որ «Էրեբունի պլազա» հյուրանոցում զինված անձ կա։ Անմիջապես դեպքի վայր են մեկնել օպերատիվ խմբեր։–0–