ԵՐԵՎԱՆ, 26 հունիսի./Նովոստի–Արմենիա/. Սահմանադրական դատարանը հրապարակել է Վենետիկի հանձնաժողովի նախագահ Ջիանի Բուքիքիոյի պատասխան նամակը Սահմանադրական դատարանի նախագահ Հրայր Թովմասյանին, որի լիազորությունները ՍԴ նախագահի պաշտոնում լրացան այսօր:
Նշենք, որ հունիսի 26–ի գիշերրը ՀՀ վարչապետ Նիկոլ Փաշինյանը հայտնեց, որ Սահմանադրական փոփոխությունները մտան ուժի մեջ։ Այս պահից սկսած Հրայր Թովմասյանը ՍԴ նախագահ չէ, իսկ Ֆելիքս Թոխյանը, Հրանտ Նազարյանը և Ալվինա Գյուլումյանը ՍԴ անդամ կամ դատավոր չեն։
«Ես ուշադիր հետևում էի Հայաստանում սահմանադրական փոփոխություններին վերաբերող զարգացումներին։ Ես ցավում եմ, որ դրանք չեն համապատասխանում Վենետիկի հանձնաժողովի հստակ հանձնարարականներին։ Ես կարող եմ միայն կոչ անել հարգել Սահմանադրությունը։ Դա հանդիսանում է իրավունքի գերակայության սկզբունքի հիմնարար պահանջ», – նշվում է Բուքիքիոյի ուղերձում։
Միաժամանակ ՍԴ–ից չեն տեղեկացրել, թե կոնկրետ ինչ նամակ է հղել Թովմասյանը Բուքիքիոյին։
Օրերս Վենետիկի հանձնաժողովը, ՀՀ իշխանությունների կողմից ուղարկված սահմանադրական փոփոխությունների մասին խորհրդատվական եզրակացության հայցին ի պատասխան, խորհուրդ էր տվել սահմանել անցումային ժամանակաշրջան։
Օրենսդրական փոփոխություններ
Հայաստանի իշխանությունները մի քանի ամիս առաջ նախաձեռնեցին 2020թ.–ի ապրիլին անցկացնել Սահմանադրական փոփոխությունների հանրաքվե, սակայն այն հետաձգվեց անորոշ ժամկետով կորոնավիրուսի համավարակի պատճառով։
Հունիսի 22-ին ԱԺ-ն երկրորդ ընթերցմամբ ամբողջությամբ ընդունեց ՍԴ-ն ցրելու նախագիծը: Փոփոխությունների նախագծով նախատեսվում է դադարեցնել Սահմանադրական դատարանի նախագահի և անդամների լիազորությունները, բացառությամբ նրանց, ովքեր ընտրվել են 2015թ.–ից հետո (Վահե Գրիգորյան և Արմեն Դիլանյան)։ Հիմա, ըստ օրենքի, ՍԴ նախագահն ու անդամները պահպանում են իրենց պաշտոնները մինչև 65 տարեկան։–0–