ԵՐԵՎԱՆ, 16 նոյեմբերի./Նովոստի–Արմենիա/. ՀՀԿ նախկին պատգամավոր Վահրամ Բաղդասարյանն ազատ է արձակվել, երկուշաբթի «Նովոստի–Արմենիա» գործակալությանը հայտնեց Բաղդասարյանի փաստաբան Վահագն Գասպարյանը։
Վահրամ Բաղդասարյանին մեղադրանք է առաջադրվել ՀՀ ՔՕ 35-300-րդ հոդվածի 1-ին մասի (իշխանության յուրացման) և 35-305-րդ հոդվածի (պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) և 235-րդ հոդվածի (ապօրինի զենք զինամթերք պահելու) հատկանիշներով։
«Դատական գործընթացն ավարտվել։ Բաղդասարյանի ձերբակալությունը ճանաչվել է ոչ իրավաչափ, կալանքը մերժվել է», – պարզաբանեց փաստաբանը։
Այս քրեական գործով անցնում են նաև ԱԱԾ նախկին տնօրեն Արթուր Վանեցյանը, ով նախօրեին ևս ազատ է արձակվել, արցախյան ազատամարտի լեգենդար հերոս, գնդապետ Աշոտ Մինասյանը, ով կալանավորվել է և ՀՅԴ անդամ Ա.Ա.–ն (ամբողջական անունը չի նշվում, խմբգր.)։
Երևանում վերջին օրերին անցկացվում են բողոքի մասշտաբային ակցիաներ, որոնք կազմակերպվում են 17 ընդդիմադիր կուսակցությունների կողմից։ Նրանք պահանջում են Փաշինյանի հրաժարականը։ Քաղաքական գործիչներն ու շարքային քաղաքացիները վրդովվել են Փաշինյանի կողմից արցախյան հայտարարության ստորագրման պատճառով, որով նախատեսվում են տարածքային զգալի զիջումներ Ադրբեջանին։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում