Թուրք-ադրբեջանական դաշինքին պետք չէ հզոր Հայաստան, նրանց պետք է ռեզերվացիա. Ոսկանյան (ՎԻԴԵՈ)

ԵՐԵՎԱՆ, 21 հունվարի./Նովոստի-Արմենիա/. Թուրք-ադրբեջանական դաշինքին պետք չէ հզոր Հայաստան, նրանց պետք է ռեզերվացիա: Այս մասի հայտարարել է ԵՊՀ Արևելագիտության ֆակուլտետի իրանագիտության ամբիոնի վարիչ Վարդան Ոսկանյանը «Նովոստի-Արմենիա» գործակալության YouTube-յան ալիքով հեռարձակվող «Հատուկ կարծիք» հաղորդաշարի ընթացքում:

«Արդյոք Թուրքիային կամ Ադրբեջանին կամ թուրք-ադրբեջանական դաշինքին պե՞տք է հզոր Հայաստան: Պատասխանը միանշանակ է, որևէ պարագայում պետք չէ: Արդյոք մեզ պե՞տք է հզոր Հայաստան, բնականաբար պետք է: Հետևաբար ակնհայտ է, որ Հայաստանի տեսլականի առումով շահերի բախում է», - ասաց Ոսկանյանը:

Փորձագետը հայտարարեց, որ Թուրքիային և Ադրբեջանին պետք է հնարավորինս թույլ, կառավարելի Հայաստան, «լավագույն իրենց համար պարագայում ռեզերվացիա հայության որոշակի խմբի համար», անդամահատված Հայաստանի Հանրապետություն, որի վրա կլինի այդ ցուցանակը, բայց իրականում այն չի ունենա զարգանալու որևէ պոտենցիալ:

«Մեզ համար նման հեռանկարն անընդունելի, անընկալելի և մերժելի է: Հետևաբար ակնհայտ է, որ կենսական խնդիրների շուրջ Հայաստանի տեսլականի առումով մեր կենսական շահերը չեն համընկնում և չեն էլ կարող համընկնել», - ասաց Ոսկանյանը:-0-