Թոշակի համար փող չկա, բայց Ալեն Սիմոնյանի նոր «պադավատի» համար 200 հազ․ դոլար կա. Արեգնազ Մանուկյան (ՎԻԴԵՈ)
12:38
07 Դեկտեմբերի 2021
ԵՐԵՎԱՆ, 7 դեկտեմբերի․/Նովոստի-Արմենիա/․ ՀՀ ԱԺ այսօրվա նիստի ժամամնակ «Հայաստան» խմբակցության պատգամավոր Արեգնազ Մանուկյանն անդրադարձավ ԱԺ խոսնակ Ալեն Սիմոնյանի համար մոտ 200 հազար դոլար արժողությամբ BMW մակնիշի մեքենա գնելու հարցին։
Կառավարությունը նոյեմբերի 25-ին որոշում է ընդունել, որի համաձայն՝ կհատկացվի 90մլն դրամ (մոտ 190 հազար դոլար) BMW մակնիշի ավտոմեքենա ձեռք բերելու համար, որը կսպասարկի ԱԺ խոսնակ Ալեն Սիմոնյանին։
«Քանի որ Ալեն Սիմոնյանը դեռ բազմաթիվ առիթներ կունենա ելույթի համար, պահանջում եմ, որպեսզի նա հանրությանը բացատրություն ներկայացնի, թե ինչ բարոյական իրավունքով է մեր երկրի այս վիճակում պետական փողերով, բյուջեի հաշվին մոտ 200 հազար դոլարանոց BMW «պադավատ» ձեռք բերում», - ասաց Մանուկյանը:
Նա նշեց, որ դա տեղի է ունեցել այն նույն օրը, երբ կառավարությունը մերժել է «Հայաստան» դաշինքի առաջարկը՝ բարձրացնել կենսաթոշակները:
«Կառավարությունը մերժում է թոշակի բարձրացումը՝ պատճառաբանելով, որ փող չկա: Թոշակի համար փող չկա, բայց Ալեն Սիմոնյանի նոր պադավատի համար, փաստորեն, կա: Դե ինչ, եկեք շնորհավորենք հպարտ քաղաքացիներին «պադավատապետության» դեմ պայքարում հերթական հաղթանակը տանելու կապակցությամբ», - ասաց Մանուկյանը:-0-