Թորոսյանի վերադարձը. առողջապահության նախարարն ակտիվացրել է սոցցանցի էջերը 4–ամսյա բացակայությունից հետո

ԵՐԵՎԱՆ, 26 դեկտեմբերի./Նովոստի–Արմենիա/. ՀՀ առողջապահության նախարար Արսեն Թորոսյանն ակտիվացրել է Facebook–յան իր էջը, որը փակել էր օգոստոսին։ Ավելի քան 4 ամիս տևած լռությունից հետո նա այսօր արդեն կատարել է երկու հրապարակում իր անձնական էջում։

Ինչ է տեղի ունեցել օգոստոսին


Օգոստոսին 5–ին ՀՀ վարչապետ Նիկոլ Փաշինյանը Թորոսյանին ուղարկեց արձակուրդ ավելի քան երկու շաբաթով։ Դրանից մեկ օր առաջ հայկական սոցցանցերում սկսեցին ակտիվորեն շրջանառվել տեղեկություններայն մասին, որ փակվել է ոչ միայն Թորոսյանի պաշտոնական, այլև անձնական էջը։ Էջ մուտք գործելու ժամանակ նշվում է, որ բովանդակությունը հասանելի չէ, հնարավոր է, օգտատերը ջնջել է բովանդակությունը կամ սահմանափակել մուտքը:

Նախարարը բավականին ակտիվ էր սոցիալական ցանցերում` ինչպես իր անձնական, այնպես էլ պաշտոնական էջերում՝ պարբերաբար հրապարակելով ոչ միայն կորոնավիրուսին վերաբերող տվյալներ, այլև ոլորտի տարբեր տեղեկություններ:

Որոշ ԶԼՄ-ներ շտապեցին եզրակացություններ անել՝ ասելով, որ սա Թորոսյանի՝ նախարարի պաշտոնից հրաժարվելու առաջին ազդանշանն է: Երկար ժամանակ շրջանառվում էին լուրեր այն մասին, թե նա կթողնի իր պաշտոնը, ինչպես իշխանությունների կողմից կորոնավիրուսի դեմ վարած քաղաքականության պատճառով, որը, ըստ որոշ սոցցանցերի օգտատերերի ձախողվել է, այնպես էլ ոլորտում աղմկահարույց հրաժարականների կապակցությամբ։ Մամուլն այն ժամանակ գրում էր, որ Փաշինյանը չափազանց դժգոհ է Թորոսյանի աշխատանքից, մասնավորապես, կորոնավիրուսի դեմ պայքարի համատեքստում։

Պաշտոնական կողմն այն ժամանակ որևէ կերպ չմեկնաբանեց իրավիճակը, Թորոսյանն էլ, ինչպես տեսանք, հրաժարական չտվեց։

Վերադարձ Facebook

Այսօր Թորոսյանն ակտիվացրեց իր Facebook–յան էջը` տեղադրելով առաջին հրապարակումը օգոստոսի 8–ից հետո, որը վերաբերում է շտապօգնության մեքենաների պարկի համալրմանը։



Մեկ ժամ անց նա կատարեց մեկ այլ հրապարակում, որում նշված է, որ վաղը Երևան կժամանի այս տարվա մեջ վերջին բեռնատար ինքնաթիռը, որը Չինաստանից կտեղափոխի 4 մեծ թթվածնի արտադրության կայան բժշկական կենտրոնների համար։–0–