ԵՐԵՎԱՆ, 18 փետրվարի./Նովոստի–Արմենիա/. ՀՀ առողջապահության նախարար Արսեն Թորոսյանը Facebook–յան իր էջում խոսել է ծննդօգնության ոլորտում պետական ֆինանսավորման ավելացման մասին` զգուշացնելով ստվերային շրջանառության անթույլատրելիության մասին։
«2019թ.–ի պետբյուջեով նախատեսված է հատկացնել լրացուցիչ 700մլն դրամ (մոտ 1,43մլն դոլար) ծննդօգնության ծառայությունների համար, որի շրջանակում բնական ծննդաբերության արժեքը կավելանա` 107 հազար դրամից դառնալով 140 հազար դրամ, կեսարյան հատման արժեքը` 198 հազար դրամից 220 հազար դրամ, իսկ բարդացած ծննդաբերության համար կհատկացվի 165 հազար դրամ», – հայտարարեց Թորոսյանը։
Նա նաև նշեց, որ ծննդօգնության ոլորտը շատ կարևոր է ինչպես ժողովրդի առողջության, այնպես էլ ժողովրդավարության տեսանկյունից, և ամենասկզբից գտնվել է իր գլխավորած գերատեսչության ուշադրության կենտրոնում։
Ադեկվատ վճար` առանց կոռուպցիայի
Նախարարն ընդգծեց, որ լրացուցիչ ֆինանսավորման ճնշող մասը կուղղվի բուժանձնակազմի աշխատավարձերի ավելացմանը։
«Մենք հաճախ ահազանգեր ենք ստանում ծննդօգնության ոլորտում փողերի ստվերային շրջանառության մասին։ Այս նախաձեռնություններով մենք փորձում ենք լուծել նաև այս խնդիրը», – հայտարարեց առողջապահության նախարարը։
Թորոսյանը նաև նշեց, որ այսուհետ բուժանձնակազմը ստանալու է ադեկվատ աշխատավարձ` բացարձակապես բացառելով ստվերային մոտեցումը, իսկ «ծննդկանները և նրանց հարազատները չպետք է բժիշկներին տան լրացուցիչ գումար»։
«Ծննդատները կարող են ծննդկաններին տրամադրել լրացուցիչ վճարովի ծառայություններ, սակայն միայն անուղղակի, որոնք չունեն ուղղակի կապ ծննդօգնության հետ։ Դա կարող են լինել վճարովի հիվանդասենյակները, լրացուցիչ ծառայություններ», – նշեց Արսեն Թորոսյանը։–0–