ԵՐԵՎԱՆ, 1 հոկտեմբերի./Նովոստի–Արմենիա/. Դատարանը բավարարեց ԱԱԾ միջնորդությունը` կալանավորելու Դավիթ Գալստյանին` առավել հայտնի «Պատրոն Դավո» մականունով: Այս մասին տեղեկացնում է նրա փաստաբան Արմեն Անդրիկյանը, հաղորդում է «Ազատություն» ռ/կ–ն:
Ավելի վաղ դատարանը բավարարել էր ՀՀ նախկին պաշտպանության նախարար Դավիթ Տոնոյանին կալանավորելու միջնորդությունը։
Նախօրեին ԱԱԾ-ն հաղորդագրություն էր տարածել՝ նշելով, որ ՀՀ ազգային անվտանգության ծառայության քննչական դեպարտամենտում շարունակվում է ՀՀ զինված ուժերի կարիքների համար ռազմամթերքի մատակարարման գործընթացում ՀՀ ՊՆ և զինված ուժերի բարձրաստիճան պաշտոնատար անձանց կողմից պաշտոնեական լիազորությունները չարաշահելու և պաշտոնեական կեղծիքներ կատարելու դեպքի առթիվ հարուցված քրեական գործի նախաքննությունը, որի շրջանակներում առանձնապես խոշոր չափերի հափշտակություն կատարելու կասկածանքով ձերբակալվել են 2018-2020 թվականներին ՀՀ պաշտպանության նախարարի պաշտոնը զբաղեցրած Դավիթ Տոնոյանը, ինչպես նաև մատակարար կազմակերպության տնօրեն Դավիթ Գալստյանը: Նույն օրը վերջիններս առանձնապես խոշոր չափերով՝ 2,277,323,840 ՀՀ դրամ գումար հափշտակելու և կեղծիքներ, հանրորեն վտանգավոր արարքներ կատարելու համար ներգրավվել են որպես մեղադրյալ։–0–