ԵՐԵՎԱՆ, 5 սեպտեմբերի./Նովոստի–Արմենիա/. Հայաստանում սպասվում են փոփոխություններ ավտոմեքենաներիզննման կարգում, կներդրվի նաև տրանսպորտային միջոցների վրա տեղադրվող գազային սարքավորումների ստուգման համակարգ։
Այս մասին նախօրեին առցանց ասուլիսի ժամանակ ասաց ՀՀ տարածքային կառավարման և ենթակառուցվածքների փոխնախարար Արմեն Սիմոնյանը։
Նրա խոսքով, կառավարությունն արդեն պատրաստել և հավանություն է տվել բավականին մեծ օրենդրական փաթեթին, որը սեպտեմբերի 9–ին կքննարկվի խորհրդարանի պրոֆիլային հանձնաժողովում։
«Նախատեսվում է փոփոխություններ կատարել տեխզննման կարգում։ Սահմանվելու է, որ նոր մեքենաները 4 տարուց հետո միայն երկու տարին մեկ պետք է անցնեն տեխնիկական զննություն, իսկ 10 տարի հետո՝ ամեն տարի», – ասաց Սիմոնյանը։
Նա նաև նշեց, որ փոփոխություններով նաև առաջարկվում է մշակել էլեկտրոնային համակարգ, որը թույլ է կտա ազատվել «տեխզննման կտրոն» հասկացությունից, որը փակցվում է ավտոմեքենայի դիմապակուն։
Փոխնախարարի խոսքով, այդ կտրոններն այսօր կրում են ֆիկտիվ բնույթ, քանի որ դրանք կարելի է ստանալ բանկում` վճարելով համապատասխան տուրք և պարզապես փակցնել մեքենայի դիմապակուն` չանցնելով իրական տեխզննում։
«Օրենքի ընդունումից հետո տեխզննումը կլինի պարտադի։ Պետք է լինելու գնալ կայան, անցնել ստուգում, որը կլինի ավտոմատացված և բավականին ընդլայնված։ Ընդ որում ստուգվող բոլոր պարամետրերն առցանց երևալու են, ինչը թույլ կտա խուսափել ոչ ստույգ ստուգումներից և բացառել տարբեր կայաններում տեխզննումը կրկին անցնելու հնարավորությունը», – ասաց Սիմոնյանը։
Փոխնախարարի խոսքով, ևս մի փոփոխություն, որը դեռ մշակվում է, գազի բալոնների գրանցման գործընթացի կարգավորման օրինագիծն է, որն արդեն հավանության է արժանացել կառավարության կողմից։
«Գազի բալոններ ունեցող բոլոր ավտոմեքենաները պետք է երկու տարին մեկ անգամ համապատասխան սերտիֆիկացում անցնեն։ Դրա համար ավտոմեքենայի սեփականատերերը պետք է իրենց մեքենաներով այցելեն համապատասխան կայաններ, որտեղ բալոնները կստուգվեն համապատասխան ճնշման տակ», – ասաց Սիմոնյանը։
Նրա խոսքով, ստուգումն անցնելուց հետո ավտոմեքենայի սեփականատիրոջը կտրվի փաստաթուղթ, որտեղ նշվելու է, որ գազի բալոնն անվտանգ է շահագործման համար։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում