Տեղաշարժման թերթիկներն այսուհետ կարելի է անվճար վերցնել Հայմամուլի բոլոր կրպակներում

ԵՐԵՎԱՆ, 26 մարտի./Նովոստի–Արմենինա/. Տեղաշարժման թերթիկները հասանելի են Հայմամուլի բոլոր կրպակներում:

Այս մասին հայտնում է Հայկական միասնական տեղեկատվական կենտրոնը։

Մարտի 24–ին ՀՀ վարչապետ Նիկոլ Փաշինյանը հայտարարեց, որ առնվազն մեկ շաբաթով երկրում գործելու են նոր սահմանափակումներ` կորոնավիրուսի տարածումը կանխելու նպատակով։


Նա հայտարարեց, որ փողոց դուրս եկած քաղաքացիները պետք է հստակ բացատրություն ունենան, թե ուր են գնում, և այդ բացատրությունը պետք է տեղավորվի կենսական անհրաժեշտ տեղաշարժի տրամաբանության մեջ։ Տեղաշարժի մեջ գտնվող բոլոր քաղաքացիները պետք է ունենան անձը հաստատող փաստաթուղթ, և պարետատունը կսահմանի քաղաքացու կողմից տեղաշարժի ձևաթուղթ (տեղաշարժման թերթիկ) լրացնելու պարտադիր պայման։

Հայաստանում մարտի 26–ի ժամը 10։00–ի դրությամբ գրանցվել է կորոնավիրուսով վարակման 290 դեպք։ Երկու պացիենտ ծայրահեղ ծանր վիճակում է։ 18 մարդ բուժվել և դուրս է գրվել հիվանդանոցից։ Մահվան դեպքեր, բարեբախտաբար, չկան։–0–