Շոյգուն շնորհակալություն է հայտնել ՀՀ–ին Սիրիային ցուցաբերած մարդասիրական օգնության համար

ԵՐԵՎԱՆ, 8 փետրվարի. /Նովոստի–Արմենիա/. ՌԴ պաշտպանության նախարար, բանակի գեներալ Սերգեյ Շոյգուն շնորհակալություն է հայտնել ՀՀ պաշտպանության նախարար Դավիթ Տոնոյանին Սիրիային ցուցաբերած մարդասիրական օգնության համար, հաղորդում է ՏԱՍՍ–ը։

«Կցանկանայի շնորհակալություն հայտնել Սիրիային ցուցաբերած մարդասիրական օգնության համար։ Դուք առաջինն արձագանքեցիք սիրիացի ժողովրդին օգնություն ցուցաբերելու մեր կոչին», – ասել է Շոյգուն։

Նա նշել է, որ դա առանձնապես կարևոր էր սիրիացի երեխաների համար, ովքեր վաղուց չեն տեսել նորմալ կյանք և 5–7 տարի չեն հաճախել դպրոց։

Տոնոյանն իր հերթին շնորհակալություն է հայտնել ռուսական կողմին Սիրիային աջակցություն ցուցաբերելու համար։

«Մեծ երախտագիտություն եմ հայտնում ՌԴ–ին, հատկապես ՊՆ–ին և անձամբ ձեզ` մեր մարդասիրական օգնությունը կազմակերպելու համար։ Դա մեծ ներդրում է», – ասաց Տոնոյանը։

Տոնոյանի խոսքով, Սիրիայում ՌԴ–ի գործունեությունը դրական է ազդում երկրի հետկոնֆլիկտային վերականգնման գործում։

«Կարծում եմ` մեր մասնակցությունն այդ մարդասիրական գործունեությանը շատ կարևոր է։ Կարևոր է օգնել սիրիացի ժողովրդին, որի մի մասն է հայկական սփյուռքը», – ավելացրել է Տոնոյանը։–0–