Շիրակի մարզի 72 հոգանոց խումբը, որը հայտնվել էր շրջափակման մեջ Մեծ Շեն և Հին Շեն գյուղերի մոտ, ճանապարհվում է տուն. պատգամավոր

ԵՐԵՎԱՆ, 19 դեկտեմբերի./Նովոստի–Արմենիա/. Շիրակի մարզի 72 հոգանոց խումբը, որը մեկնել էր Արցախի պատերազմին ու հայտնվել շրջափակման մեջ Մեծ Շեն և Հին Շեն գյուղերի մոտ, ճանապարհվում է տուն։


Այս մասին հայտնել է ԱԺ պատգամավոր Սոֆյա Հովսեփյանը Facebook–յան իր էջում։

«Հարգելի՛ քաղաքացիներ, ես և Նազելի Բաղդասարյանը նոր վերադարձանք Շուշիի շրջանի Մեծ Շեն և Հին Շեն գյուղերից ։ Այնտեղ ամեն ինչ նորալ է, ճանապարհները բաց են խաղապահներն էլ իրենց տեղում», – նշել է նա։

Հովսեփյանի խոսքով, Շիրակի մարզի 72 հոգանոց խումբը ճանապարհվեց դեպի տուն։

«Ամեն ինչ կարգին է և հերթափոխն էլ հավուր պատշաճի կազմակերված էր։ Բոլորին տեսել ենք, բոլորն էլ լավ էին և ժամերի ընթացքում կլինեն մարզում։ Խնդրում եմ ուշադիր լինեք տեղեկատվության տարածման հարցում», – նշել է նա:

Հովսեփյանը որպես հետգրություն ավելացրել է, որ խոսքը չի վերաբերում գերիներին։–0–