ԵՐԵՎԱՆ, 2 փետրվարի./Նովոստի-Արմենիա/.Սևանա լճի մակարդակն այս տարվա հունվարի 24-30-ն ընկած ժամանակահատվածում նվազել է 1 սմ-ով և հունվարի 30-ի դրությամբ կազմել է 1900.39 մ, ինչը 13 սմ-ով ցածր է նախորդ տարվա նույն ժամանակահատվածի դրությամբ: Այս մասին հայտնում է ՀՀ ՇՄՆ Հիդրոօդերևութաբանության և մոնիթորինգի կենտրոնը:
Հաղորդագրությունում ասվում է նաև, որ հունվարի 24-30-ը Արփա-Սևան ջրանցքով լիճ մտնող ջրի ծավալը կազմել է 1 268 մլն մ3, իսկ 2022 թ.-ի հունվարի 1-ից 30-ն ընկած ժամանակահատվածում` 7 338 մլն մ3։
Ըստ Հիդրոօդերևութաբանության և մոնիթորինգի կենտրոնի ներկայացրած տվյալների` Սևանա լճի ջրի մակարդակը 2012-ից մինչև 2022 թ.-ի հունվարի 30-ի դրությամբ ամենացածր ցուցանիշը գրանցվել է 2013 թ.-ին (1900.09 մ), իսկ ամենաբարձրը ՝ 2021 թ.-ին (1900.52 մ):
Նախորդ տարվա փետրվարին, ըստ Շրջակա միջավայրի նախարարության ներկայացված տվյալների՝ 2021 թ.-ին գրանցվել է Սևանա լճի մակարդակի ամենաբարձր ցուցանիշը վերջին 5 տարիների ընթացքում:|
2021 թ.-ի օգոստոսին ԱԺ-ն հավանություն է տվել «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան և համալիր ծրագրերը հաստատելու մասին» օրենքում փոփոխություններին, ըստ որի նախատեսվում է 2021 թ.-ի ոռոգման շրջանում Սևանա լճից ոռոգման նպատակով ջրբացթողումների տարեկան առավելագույն ծավալը սահմանել 245 մլն մ3 նախկին 170 մլն մ3-ի փոխարեն:
Հիշեցնենք, որ 2017 թ.-ին չոր եղանակի պատճառով ջրբացթողումների ծավալն ավելացել է 100 մլն մ3-ով՝ գերազանցելով նախատեսված 170 մլն մ3-ին։ Նույն ծավալով էր նախատեսված նաև 2018-ին, սակայն օգոստոսի 29-ին ԱԺ-ն հավանություն տվեց մինչև 210 մլն մ3 ջրբացթողումների ծրագրին։ 2020 թ.-ին բացթողումների ծավալը չի գերազանցել թույլատրելի սահմանը։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
