Սարյանի ժառանգները Հայաստանի ազգային պատկերասրահից նրա նկարներով հուշանվերների վաճառքից իրենց մասնաբաժինն են պահանջում.

ԵՐԵՎԱՆ, 11 փետրվարի. /Նովոստի-Արմենիա/. Հայաստանի ազգային պատկերասրահը (ՀԱՊ) դադարեցրել է նկարիչ Մարտիրոս Սարյանի՝ ՀԱՊ-ին պատկանող արվեստի գործերի վերատպությամբ հուշանվերների ցուցադրությունն ու վաճառքը: Ինչպես գրում է «Հայկական ժամանակը» պատկերասրահը հայտարարել էր, որ դա Սարյանի ընտանիքի պահանջն է:

Սարյանի ժառանգները, այդ թվում՝ նկարչի թոռնուհի, «Մարտիրոս Սարյան» տուն-թանգարանի տնօրեն Ռուզան Սարյանը, պահանջում են հեղինակային իրավունքի պահպանում:

Ռուզան Սարյանը հայտնել է, որ պատկերասրահին ոչ թե արգելում են արտադրել և վաճառել Սարյանի ստեղծագործություններով արտադրանքը, այլ ներկայացված է պահանջ՝ գործել օրենքի դաշտում, չխախտել «Հեղինակային իրավունքի և հարակից իրավունքների մասին» ՀՀ օրենքով սահմանված և Մարտիրոս Սարյանի ժառանգներին պատկանող բացառիկ հեղինակային իրավունքը: Նա հայտնել է, որ իրենք հրավիրել են բանակցությունների, որից պատկերասրահի ներկայացուցիչները հրաժարվել:

Մասնավորապես, ժառանգները ցանկանում են որոշել Սարյանի ստեղծագործությունների ցանկը, որոնց պատկերները կօգտագործվեն հուշանվերների արտադրության մեջ, դրա կարգը և ծավալը, ինչպես նաև հավակնում են շահույթի իրենց բաժնին, որը չի գերազանցի 20% -ը: -0-