«Սա խայտառակություն է». պատգամավոր Տիգրան Ուրիխանյանը վրդովվել է ՀՀ տարածքում ադրբեջանցիների դիրքերի տեղակայման լուրերի կապակցությամբ

ԵՐԵՎԱՆ, 17 մայիսի./Նովոստի–Արմենիա/. ԱԺ պատգամավոր, «Ալյանս» կուսակցության ղեկավար Տիգրան Ուրիխանյանը վրդովմունք է հայտնել այն տեղեկությունների կապակցությամբ, որ ադրբեջանցիները դիրքեր են տեղակայում ՀՀ տարածքում։

«Վե՛րջ։ Սա խայտառակություն է։ Ադրբեջանցիները դիրքեր են տեղակայում ՀՀ տարածքում։ Սա չի՛ կարող լինել հանդուրժելի, չի՛ կարող լինել թույլատրելի։ Մարդի՛կ, ուշքի եկեք, մտան մեր տուն», – գրել է Ուրիխանյանը Facebook-յան իր էջում։

Նա հայտարարել է, որ անհապաղ սկսելու են քաղաքական գործընթաց, որի միակ նպատակն է լինելու դիմագրավել տեղի ունեցող ընթացքին։
«Անհրաժեշտ է շտապ միավորվել բոլորով, ովքեր կեղտոտ խաղի մեջ չեն», – նշել է Ուրիխանյանը։

Հայկական մի շարք ԶԼՄ–ներ հայտնել են, որ Սյունիքում գեներալ Մուրադովի մասնակցությամբ ընթացած բանակցություններով ձեռք բերված պայմանավորվածության համաձայն՝ ընդհանուր լարվածությունը թուլացնելու համար ադրբեջանցի զինվորականները Սյունիքի սահմանում հետ են գնալու, բայց հայկական դիրքերի մոտ դեռ 2 սահմանային կետ թողնելու են։ Բանակցությունները կշարունակվեն 2 օրից։

Պաշտպանության նախարարության կամ որևէ այլ պետական գերատեսչության կողմից պաշտոնական տեղեկություն դեռ չի ստացվել։–0–