ԵՐԵՎԱՆ, 8 դեկտեմբերի./Նովոստի–Արմենիա/. Սահմանադրական դատարանը աշխատակարգային որոշմամբ մերժել է վարույթ ընդունել «Բարգավաճ Հայաստան» ընդդիմադիր խմբակցության առաջնորդ Գագիկ Ծառուկյանի պատգամավորական լիազորությունները դադարեցնելու հարցով` Ազգային ժողովի խորհրդի դիմումը, տեղեկացրել է ՍԴ–ի մամուլի քարտուղար Եվա Թովմասյանը։
«Որոշումն օրենքով սահմանված կարգով եռօրյա ժամկետում կուղարկվի կողմերին և կհրապարակվի Սահմանադրական դատարանի պաշտոնական կայքում», – նշել է նա Facebook–յան իր էջում։
ՀՀ ԱԺ խորհուրդը նոյեմբերի 24–ին կողմ քվեարկեց Գագիկ Ծառուկյանին պատգամավորական մանդատից զրկելուն։ Ծառուկյանի գլխավորած խմբակցության անդամները կարծում են, որ որոշումը կրում է քաղաքական բնույթ։
Նոյեմբերի 25–ին ՍԴ–ն «Mulberry» էլեկտրոնային փաստաթղթաշրջանառության համակարգի միջոցով ստացել է ՀՀ ԱԺ խորհրդի հայտարարությունը Ծառուկյանի պատգամավորական լիազորությունները դադարեցնելու մասին։
Ավելի վաղ Ծառուկյանը բերման էր ենթարկվել ՀՀ քրեական օրենսգրքի 225.1 հոդվածի (Զանգվածային անկարգություններ) հոդվածով նախատեսված հանցագործություն կատարելու կասկածանքով (ռազմական դրության ընթացքում ՀՀ օրենքն արգելում է հավաքների կազմակերպումը և դրանց մասնակցելը - խմբ.): Նոյեմբերի 13-ին դատարանի որոշմամբ նա ազատ է արձակվել:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում