Ռետինե փափուկ հատակներ` ավազի կամ ասֆալտի փոխարեն. Երևանի բակերի խաղահրապարակները պատվում են ռետինե գորգերով (ՖՈՏՈ, ՎԻԴԵՈ)

ԵՐԵՎԱՆ, 28 հոկտեմբերի./Նովոստի–Արմենիա/. Երևանի քաղաքապետարանի ծրագրով քաղաքի բակերում խաղահրապարակները պատվում են ռետինե գորգերով, հաղորդում է Երևանի քաղաքապետարանի մամուլի ծառայությունը:                     

«2800քմ ծավալ ենք դրել մրցույթի 12 վարչական շրջաններում: Յուրաքանչյուր շրջանում 2-3 բակ է նախատեսած»,- նշում է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը:                                                                                 

Աշխարհում ընդունված այս մոտեցումը, առայժմ փորձնական ծրագրով կիրառվում է նաև Երևանում: Ավազի կամ ասֆալտի փոխարեն երևանյան խաղահրապարակներում արդեն տեղադրվել են ռետինե փափուկ հատակներ:      

«Անվտանգ, կայուն նյութ է, փափուկ և երեխաների համար բնապահպանապես մաքուր»,- ասել է Գրիգոր Հարությունյանը:      

Երևանի քաղաքապետարանի շինարարության և բարեկարգման վարչության պետի խոսքով՝ 2020թ. ծրագրի ծավալը կմեծանա. «Հաջորդ տարվա համար արդեն բյուջեն նախատեսել ենք կրկնակի՝ 100 մլն դրամի չափով ենք իրականացնելու: Հավաստագրում գրված է, որ այս հատակների երաշխիքը 7-10 տարի է»:

Փորձնական ծրագրում այս տարի ընդհանուր առմամբ ներառված է 23 բակային տարածք: 

Բարեկարգման ծրագրերին զուգահեռ՝ երևանյան բակերը նաև ամենօրյա խնամքի կարիք ունեն: Յուրաքանչյուր տարի համայնքային բյուջեն այդ նպատակով միջոցներ է հատկացնում վարչական շրջաններին:–0–