ԵՐԵՎԱՆ, 4 նոյեմբերի./Նովոստի–Արմենիա/. Քննչական կոմիտեն չի բացառում, որ վարձկանների գործով կլինեն 4-5 հետախուզվող մեղադրյալներ, չորեքշաբթի լրագրողներին ասաց ՔԿ նախագահի տեղակալ Արտուշ Մելիքյանը։
Նրա խոսքով, վարձկանների վերաբերյալ` Քննչական կոմիտեում քննվող քրեական գործի նշանակությունը մեծ է, ինչպես քաղաքական, այնպես էլ իրավական առումով։
Մելիքյանը նշեց, որ այս գործով ձեռք բերված ապացույցները նախաքննության միջանկյալ և ավարտական փուլերում կօգտագործվեն ՝ ինչպես քաղաքական դաշտում քննարկումների ժամանակ, այնպես էլ իրավական հարթակներում։
Загружается новость ... "Лево"
«Համբերատար սպասեք և կտեսնեք՝ ինչ ապացույցներով ինչ փաստական հանգամանքներ են հիմնավորվում։ Եթե Քննչական կոմիտեն հայտարարում է, որ ապացուցված է տվյալ անձի վարձկանության փաստը, ապա որոշ ժամանակ անց կներկայացվեն նաև այլ հանգամանքներ», – ասաց Մելիքյանը։
Նրա խոսքով, ՔԿ–ն քրեական գործով սկզբնական, բայց շատ ակտիվ փուլում է գտնվում։
Նա ընդգծեց, որ այս պահին քրեական գործով ներգրավված են երկու վարձկաններ, նրանք պատմում են, թե ինչպես են հայտնվել Արցածում, իսկ դատական մարմինները գտնում են լծակներ և ապացույցներ` այդ փաստերը պարզելու և ստուգելու համար։
«Դեռ վաղ է խոսել քննության ամբողջական արդյունքների մասին, բայց ես չեմ բացառում, որ վաղն ունենանք 4-5 հետախուզվող մեղադրյալ։ Գիտեք, որ հնչում են անուններ, նրանց վերաբերյալ ապացույցներ հավաքելուց հետո ներգրավվելու ենք որպես մեղադրյալ, անկախ նրանից՝ Հայաստանում կլինեն, թե ոչ», – ասաց Մելիքյանը։
Նա նշեց, որ այս պահին ՔԿ-ն համագործակցում է ՀՀ ԱԱԾ-ի հետ։
«ԱԱԾ-ի խողողովակներն այդ առումով ավելի ընդլայնված են։ Այս պահի դրությամբ չեմ բացառում, որ վաղը մենք որևէ երկիր քննչական պահանջ կուղարկենք։ Այս պահի դրությամբ դեռ այլ պետությունների հետ չենք աշխատում, բայց նախատեսում ենք», – ասաց Մելիքյանը` պատասխանելով ահաբեկիչներին որոնելու համար Ինտերպոլ դիմելու հնարավորության մասին հարցին։–0–